【傳奇球員】荷蘭冰王子 - 柏金

文：MenClub 波特先生　　圖：互聯網
POSTED ON 23 May 2018


如果要你諗英超金球，唔知你又會第一時間諗起邊一球呢？朗尼嘅超級倒掛？安尼簡恩12碼點倒掛？亨利長驅直進禁區頂一盪？如果係我，我就係諗起以下呢一球。

無錯，以上呢球金球嘅主角就係阿仙奴傳奇球員，黎自荷蘭嘅「冰王子」柏金(Dennis Bergkamp)。作為當年嘅隊友，亨利曾形容柏金為「前鋒們夢想的搭檔」，可想而知呢位荷蘭人究竟有幾出色。

現年48歲嘅柏金，喺2006年夏天結束球員生涯，之後開始讀上教練課程，並回到母會阿積士作教練訓練生。直至2011年，柏金終於成為阿積士正式教練嘅一員。不過，由於新領隊嘅到來，令柏金喺球隊嘅角色大變，最終佢喺2017年12月被解僱，暫時未知佢未來嘅去向。

講番球員時期嘅柏金，佢可以話當年同期入面技術最好嘅荷蘭球員，而佢早喺12歲(1981年)就已經進入當年享負盛名嘅阿積士青訓，其後佢一直訓練左5年，直到1986年12月佢終於首次代表阿積士一隊上陣。

初出道嘅柏金，喺球場上主要踢翼鋒，所以入球都唔算好多。直到黎來慢慢移入中路，成為前鋒或輔鋒後，柏金嘅入球數字明顯有所提升，其中佢喺阿積士最後3個賽季，喺120場比賽入面攻入89球，效率絕對可以用恐佈來形容。

1993年，柏金希望轉戰更高級別嘅聯賽，而當時皇馬對佢有巨大嘅興趣，但聽從告魯夫嘅意見，再加上佢自己嘅想法，最終柏金選擇到當時被譽為世界最佳聯賽嘅意甲，而加盟嘅球隊則係國際米蘭，轉會費為710萬鎊。

不過轉戰意甲嘅柏金並未能展現最好嘅自己，特別係1994年世界盃後佢處於巨大壓力及身體積累唔少疲勞，最終令佢喺國米嘅第二個賽季上陣26場只係攻入4球，加上柏金性格內斂，同意大利嘅傳媒關係並不好，所以佢喺米蘭過得並唔愉快。因此，喺1995年夏天阿仙奴以750萬鎊將柏金帶到高貝利球場，而呢次轉會亦將柏金終於搵到自己嘅家。

黎到英格蘭聯賽，柏金並唔係順風順水，佢都係經歷左一段適應先搵到自己嘅節奏，而最重要嘅一點就係1996年阿仙奴請來了雲加當新任領隊，雲爺爺好快就知道點樣可以發揮柏金嘅最佳實力。果然，柏金真係成為阿仙奴嘅核心之一，佢喺97-98球季喺英超攻入16球，助球隊成功奪得轉為英超後的首個聯賽冠軍。

之後亨利嘅加入，令阿仙奴前線上變得更強大，而柏金嘅傳控亦都已經達到爐火純青嘅級別，最終喺2001-02及2003-04球季阿仙奴兩次奪得英超聯賽冠軍，而03-04球季則更加係史無前例咁全季不敗奪冠，其中因為佢地嘅進攻太犀利因此被形容為「水銀瀉地」。

喺阿仙奴效力11個球季，柏金最終喺2006年正式掛靴，期間佢一共上陣左423場比賽攻入120球，為阿仙奴帶黎3次英超冠軍、4次足總盃冠軍及3次社區盾冠軍。而足以載入史冊嘅世紀金球則喺2002年發生的，雖然柏金曾表示呢一球係幸運成份具多，但無論點都好呢一球都係夢幻的。

國家隊方面，柏金喺1990年開始成為大國腳，並一直為國征戰11年，期間上陣79場攻入37球。

個人獎項方面，柏金喺1992年金球獎成為第3名，而喺1993年則成為第2名；世界足球先生獎項佢就喺1993及1997年分別成為第3名。

柏金踢波嘅風格都係以技術為主，其細膩嘅踢法往往相當簡單，絕對不含多餘嘅動作同時極具觀賞性。值得一提嘅係，柏金喺1994年世界盃之後患上「飛行恐懼症」，佢係完全唔可以坐飛機的，所以任何需要乘坐飛機先可以參加嘅比賽佢都唔能夠參加，唯一嘅選擇就係以陸路前去。

睇到柏金優秀嘅技術，再睇下如今荷蘭國家隊嘅慘況，先係缺席2016年嘅歐國盃，再到2018世界盃外圍賽出局，荷蘭國家隊已經進入前所未見嘅困局，見到自己一班師弟咁唔爭氣，相信柏金都好慶幸自己唔係呢個年代嘅球員，同埋原來自己能夠打入決賽週已經值得感恩。