【好定唔好？】雲加冬窗後會後悔嗎？

文：MenClub 波特先生　　圖：互聯網
POSTED ON 01 Feb 2018

喺歐洲足壇冬季轉會窗即將關閉前，唔少交易亦正式完成，其中阿仙奴可以話係今個轉會動作最多嘅球隊之一，佢地先後將前鋒山齊士、基奧特及禾確特送走，其後又從多蒙特帶黎射手奧巴美揚。

雖然奧巴美揚作為射手嘅實力令人期待，但係外界普遍都唔敢抱好大嘅期望，因為佢地唔認為領隊雲加有能力改變目前阿仙奴嘅情況。而就喺唔少人都睇淡阿仙奴之際，佢地亦都發生緊唔係向好個方面走嘅野。

首先，奧巴美揚離開多蒙特後，球隊嘅股價即刻上升，由5.65歐元升至5.88歐元，雖然宜家維持大慨5.8歐元，但係從奧巴美揚收番黎嘅5600萬鎊轉會費，足以令多蒙特嘅年度總營業額超過5億歐元，係球隊新嘅紀錄，所以相信球隊股價將好大機會持續穩步上揚。值得一提嘅係，多蒙特係德甲唯一一支上左市嘅球隊，呢個係連班霸拜仁慕尼黑都無份嘅事。

而再睇下離開左阿仙奴嘅球員，禾確特轉投愛華頓首次披甲，即刻梅花二度，為新東家以2：1擊敗李斯特城，唔知下場面對番阿仙奴，「禾仔」會唔會助「拖肥糖」擊敗老東家呢？如果係唔知雲加會唔會嘔十幾兩血呢？

而「銀河唯一」基奧特，則喺岩岩代表阿仙奴最後一場上陣時以1：3不敵史雲斯之後，一加盟車路士球隊又即刻輸0：3，雖然呢場基奧特無上陣，但係一日之內體驗兩場大敗絕對唔會好受。

同樣，山齊士首次為曼聯喺英超上陣下，球隊卻以0：2不敵熱刺，實在令人失望。