【為普通人而設的跑步比賽 - Boerne 0.5K】

文：MenClub 波特先生　　圖：互聯網
POSTED ON 11 May 2018

如今香港嘅跑步比賽，除左大多真係一個比賽之外，就更加似一個嘉年華，好似比賽中間會有唔同嘅美食補給站，完成比賽之後又有唔同嘅活動比一家大細參加，基本上係全城市民一齊參與嘅大型體育活動。

不過，要想參加呢啲跑步比賽都唔係容易，因為大部份賽事最短路程嘅都要10公里(10K)，最長嘅全馬則達到42點幾K，仲有超級馬拉松隨時講緊100K，所以你話一個普通人想參與都真係好難完成得到。

而外國就有一個跑步賽事反其道而行，佢地嘅比賽全程就只有0.5K，亦即係500米，呢個距離基本上你行都係幾分鐘至10分鐘左右嘅事，如果你跑就更加快完成，所以就算你無係練開跑嘅普通人，呢個賽事你都絕對有能力去完成。

可能你會諗得個500米路程搵鬼玩咩，唔好意思個賽事目前已經爆滿，除左因為佢有齊晒其他賽事有嘅野，例如：完賽獎牌、比賽貼紙、T恤、中途補給站(500米都要補給?)等，佢地仲特設一個吸煙座位，等如有參加者中途想食煙，都可以食得自在。

如果你話你連500米都無信心走完，咁你就可以報名VIP名額，屆時主辦單位就會用一台福斯 T2嘅古董巴士將你直接車到去終點，然後你會繼續拎到完賽獎牌，而呢個獎牌甚至要比正常參加比賽嘅朋友更大。


而能夠吸引咁多人參加呢個賽事，其中一個主因係賽事係為左慈善，賽事所有收益會用黎贊助濟貧計畫Blessings In a Backpack嘅Boerne分會，而呢個會就會幫助一啲星期六日無學返嘅小朋友為佢地提供食物。