踏入5月，天氣開始正式轉熱，亦代表住活力十足嘅夏天又黎啦！鍾意行山嘅你，可能會覺得夏天喺香港行山真係非常難頂，因為實在非常熱。因為咁樣，所以唔少朋友都會選擇行山澗，因為當中會經過石澗、水潭或小瀑布，咁中間你就可以玩下水，從而降下溫。

不過，正所謂嬉山莫嬉水，玩水從來都係危險嘅活動，一唔小心可能就會受傷，甚至失去性命，所以小心留神，做足安全措施最重要！

今次，我地就搵黎資深山藝教練吳銨洋Ken Sir黎同我地講解下行山澗要留意嘅地方:

Ken Sir表示，行山澗最容易發生嘅意外就係遇溺，因為唔少朋友都睇小左水潭嘅危險，特別係你肉眼所見嘅深度，同實際水潭嘅深度可能會唔一樣。又或者因為有水流過嘅石頭唔少都佈滿青苔，所以非常容易令人滑倒，唔少人因此會跌入水潭，再加上可能撞至失去知覺，最終遇溺身亡。

另一樣就係墜崖，因為山澗嘅路段有唔少都係非常陡斜，所以行山人士如果一個唔留神可能會失去平衡，導致飛墜落山。

仲有仲有，行山澗一定要帶備適合嘅裝備，除非你係行一啲較為簡單嘅路段，否則行山澗基本上手腳一定會並用，咁可能你就需要帶備手套。而由於路段較為處於叢林中，所以可能帶埋頭盔就可以防止頭部撞到樹枝。

當然，一定要有一對防滑行山澗專用嘅鞋，如果唔係當你行斜坡嘅時候，可能就會較容易滑倒，而如果著波鞋亦都唔太適合經過有水嘅地方，所以下次去行山澗嘅時候，一定要做足準備，小心為上！