今年日本嘅Fuji Rock Festival 就啱啱喺上個月月尾完美落幕啦，雖然過多幾日日本嘅另一個年度音樂盛事 — Summer Sonic Festival 都開始舉行啦，但係位於香港嘅我哋多數都係得個睇字。

無論你同我一樣都係對住 Summer Sonic 個 Line Up 得個睇字，又或是你準備過幾日飛去睇嘅，都可以喺度一齊睇吓早兩日公布嘅 Clockenflap 2018 首發陣容先！

Interpol．Khalid．David Byrne．安溥ANPU．Caribou．The Vaccines．Wolf Alice．Amadou & Mariam．Cornelius．Rhye．Alvvays．Eats Everything．9m88

（次序為依照 Clockenflap Official Website 所顯示的次序）

好多演出單位都未聽過？！好正常，亦都唔使驚，因為　發掘　正正就係Clockenflap嘅其中一個嘅重點，無論係新嘅音樂單位，又或是香港比較小人識嘅各方獨立音樂單位，Clockenflap每年會幫大家發掘嚟香港演出，等你去親身體驗！

以下係我自己私心嘅音樂單位介紹，畢竟如果要介紹哂嘅話一定會篇幅過多，大家都係會睇到瞓著。

安溥 ANPU

講安溥呢個本名可能大家未聽過，但係如果講佢之前嘅藝名—張懸嘅話，大家會唔會有多啲印象呢？

安溥係來自台灣嘅獨立女歌手，佢早喺2002年已經出道，以其風格強烈嘅民謠曲風，加上佢時而細如微絲；時而剛強嘅聲線，多年來都好受台灣樂迷所歡迎。

喺2015年嘅《潮水箴言》演唱會之後，張懸喺音樂事業上開始咗長達三年嘅休息，三年後嘅2018年，佢用返本名—安溥嘅名義喺音樂路上重新上路。

長時間閉關後嘅復出，令到台灣嘅樂迷重新著狂，佢復出後嘅首場個唱《煉雲》只係用咗分半鐘嘅時間就賣哂所有嘅門票，可見安溥嘅受歡迎程度係幾咁大！

喺呢度就畀大家聽吓佢我本人最鍾意嘅作品：〈寶貝〉

Khalid

可能係成個首發陣容中最多人識嘅音樂單位，嚟自美國德克薩斯州嘅歌手，年紀輕輕只有20歲就已經喺 R&B 界中擁有住好高嘅人氣！佢喺2016年發布嘅首隻單曲《Location》就已經登上咗美國嘅 Billboard Hot 100，仲曾經一度登上第16名嘅位置，同時呢首歌亦都廣泛咁畀美國當地嘅樂迷點播。

憑住佢獨特嘅演唱手法同略帶"慣洋洋"嘅嗓音，令到Khald喺R&B界可以突圍而出，成為呢兩年美國R&B界嘅當紅炸子雞！

喺度就比大家聽吓佢同Imagine Dragon合作嘅 "Thunder / Young Dumb & Broke” 串燒作品！