今日年初三赤口，傳統嚟講呢日都唔會出去拜年，怕相嗌唔好口，我就唔怕同大家拜年嘅，因為我應該都唔會面對面見到大家呀嘛！祝各位Gentlemen猴年財色兼收，心想事成，身體健康，不勞而獲。不過唔好意思，我無足金金猴送呀。

上次就講中超啲痴線轉會，篇文出街後仲有幾單新嘅交易完成咗都無講到，相信大家都見識到而家中國球會幾財雄勢大。除左球會，大中華地區對歐洲球會嚟講都係重要市場嚟架。所以農曆新年一到，好多歐洲球會都會搞下新意思同中國或者香港嘅球迷拜年，好似拍條片叫班球星用中文拜年之類，但佢哋啲中文你聽唔聽得明就睇你啦。而家淨係咁都唔夠架，仲要夠創意先氹到班球迷架嘛。有啲球會都好有心架，一齊睇睇啦。

祖雲達斯－新年常識問答比賽

祖雲達斯近年好重視香港市場，早兩年祖記仲搞咗香港版嘅juvestore添！今次祖記就搵咗戴巴拉、莫拉達同普巴三位球星搞咗個農曆新年常識問答比賽，結果係莫拉達贏咗！條片佢三位都好搞笑好佻皮，而且無揸流灘，好認真答問題之餘，有爭議性判決都好似平時咁會同主持理論架，祖記好早就拍起條片放埋上網，睇過唔緊要，咪重温多次囉。

羅馬－笑談普通話再射馬騮

羅馬一向都重視農曆新年就係人都知，舊年有「拜個早年」波衫，今年就有「金猴報喜」，件衫靚到唔入返件都對唔住自己呀！羅馬今年就搵咗個賀年女郎教班羅馬球員用普通話講「猴年快樂」（條女得唔得就見人見智啦），艾沙拉維同施捷斯尼講得最好，施捷斯尼學得兩句似樣仲懶醒教人添！另外仲有大玩猴年crossbar challenge，不過就無乜特別，又唔知同新年有乜關係。

皇家馬德里－中國青年軍帶領一隊球員同你拜年

銀河艦隊全世界都有Fans，新年到點都要同大中華地區球迷拜下年，今次皇馬就借呢個機會俾青年軍嘅中國球員林良銘介紹自己。林良銘去皇馬之前效力廣州富力，上年以２２萬歐元轉會，位置係左中場，皇馬真係識宣傳呀！林良銘介紹完自己同講完賀年說話之後，就到一隊班球星啦，我敢講，你如果聽清楚晒佢哋講緊乜，你應該可以步利嘉兒後塵去大台教普通話。

曼城－即場拆利是，挑戰重口味中菜勇者塔

截圖自：Manchester City FC

曼城同祖記一樣，都非常重視香港市場，連佢哋嘅官網都有繁體中文版，夠晒香港味。所以賀年片都拍咗好幾條，最特別嘅就係呢兩條啦，同樣搵左祖赫特、迪布尼、阿古路同戴夫同大家拜年，首先就係一眾球星玩即場拆利是，點解戴夫拎住封利是話掟鏢有用？要大家自己睇啦。

更值得講係四位球星玩中菜勇者塔，一齊品嘗豬耳、鴨舌（好似台灣架喎）同埋鳳爪，阿古路俾工作人員整蠱，話鴨舌係蝙蝠嚟。佢食完鳳爪個樣都好搞笑。

曼城之後仲有唔同嘅賀年短片出街，各位有興趣可以去佢哋facebook fan page睇睇。

愛華頓、阿士東維拉－最講心唔講金

截圖自：Aston Villa FC - Official

其實兩條片都唔係有乜特別，最特別係兩支唔係喺大中華區特別多球迷嘅球會，但仍然無忽略佢哋，但求喺新年呢個喜慶日子同中國同香港球迷拜年。特別係阿士東維拉，事關佢哋而家護級形勢危急，對華人球迷都算係唔話得啦

曼聯－是是但但為求交差

截圖自：Manchester United

身為一個忠心紅魔迷，睇完真係媽媽聲。搞錯呀！堂堂曼聯喺大中華區咁多球迷，叫啲球員做下樣同球迷拜年都懶，求求其其去奧脫福出面叫球迷講幾句就算，不如唔好搞啦。枉亞洲為曼聯帶嚟咁多收入，係咪因為球迷點都會買波衫，就唔使咁好招呼先？

唔止曼聯，好似車路士同利物浦兩間都好多亞洲球迷嘅球會都係無乜表示，話晒英超都係香港最受歡迎嘅聯賽，竟然連呢啲氹球迷開心嘅門面嘢都唔做，都幾令人費解。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。