聲稱收到堅料嘅Eurogamer，就話任天堂NX將會係一部高性能嘅手提遊戲機，睇落似係一部平板加兩個可拆式手掣，而且仲可以將主機插落底座，將畫面輸出到大屏幕玩添。講講下真係有少少似Razer早幾年出嘅Edge Pro，不過消息話NX唔係行Windows同Android，而係走返轉頭玩插帶。

事關有眼利fans曾喺上個月發現《The Legend of Zelda: Breath of the Wild》進行商標註冊時，竟然有提到「video game cartridges」字眼，而呢句字眼一向只會喺3DS呢類卡帶遊戲先會出現，即時令人聯想到呢隻NX新作有可能用帶玩。

至於規格方面有多少少資料，NX將會用行動裝置常用嘅NVIDIA Tegra X1影像處理器，由於有傳卡帶容量上限只得32GB，加上任天堂主機不嬲都唔係以性能為賣點，所以呢個推斷都有一定可能性。雖然Eurogamer話以上消息都係堅料，而佢哋可信性又真係好高，但任天堂一日唔開口都算證實，所以大家不妨等到9月，事關任天堂好大機會趁TGS 2016前就會公布NX消息。

Eurogamer