{ SKIP }
文:MenClub 魏文青  
POSTED ON 03 Jan 2017
新年三日假期,你哋一定同班Friend、同條女玩得好開心啦係咪?我都玩得好開心,不過作為一個毒L,我就唔係同朋友玩,而係自己同自己玩…咁都唔係玩手指,更加唔係玩JJ,而係玩玩具——就例如呢隻由孩之寶出嘅遙控AC-ACT咁,就玩咗我好耐啦!


有睇過下《Star Wars》就應該知咩係AT-AT(All Terrain Armored Transport),而喺《Rogue One》就出現咗隻新型號叫「AT-ACT」,全名係「All Terrain Armored Cargo Transport),顧名思義就即係AT-AT嘅運貨版兄弟。佢比一舨嘅AT-AT要大隻啲,而且機身正中亦有個可以打開、拆卸嘅貨櫃,主要負責運送建築材料或者武器補給。而今次孩之寶出嘅遙控版亦都非常大隻,淨係個盒都有膝頭咁高,而砌起之後隻AT-ACT仲高過個盒!


講明係「Cargo」嘛,所以先睇下個貨櫃。位於機身正中央嘅貨櫃可以從兩邊打開,之後就會見到載貨空間同一個炮台,配合埋隨機附送嘅3.75吋公仔,就可以做出戲中人物操作炮台嘅情景。


另外成個貨櫃可以拆出黎,再用隨機附送嘅絞盤配件連埋。根據個盒底講,理論上就可以沿住條繩瀡隻3.75吋Figure落去。但因為個「絞盤」其實只係一條繩,就算拉「行」咗都支持唔到一隻Figure嘅重量,所以又係一個「想像很豐滿,現實很骨感」嘅設定啦!


另外機頭打開又可以坐多隻3.75吋,雖然放咗落去就會覺得個比例唔多妥當。而側邊紅色嗰啲係子彈黎,一陣話你知有咩用。


同之前嘅R2-D2一樣,呢隻AT-ACT都可以用藍芽連接電話,再用孩之寶嘅「STUDIOFX」APP黎控制。除咗向前行(係冇向後嘅)、擰頭同發聲之外,亦可以控制機頭兩邊嘅死光炮著燈,甚至可以發射機頭嘅子彈!都真係射得幾遠架!


另外亦可以設定AT-ACT嘅行動再拍片,仲可以加入FX特效,令到現場感大增!



隨機附送嘅3.75吋公仔

同系列嘅其他角色(分開發售)


整體黎講,呢隻AT-ACT(連埋個APP)係一套非常完整嘅玩具,而如果你有心思(同金錢去買哂其他角色返黎),你都真係可以拍得出幾有趣嘅片段,而且你玩得越多,個APP就會有越多特效,唔會兩玩就冇嘢好玩。不過要注意嘅係佢外形造功唔算好仔細,雖然好重手,但睇落依然幾「膠」。配合3.75吋公仔玩係唔錯,但兩者嘅比例唔同,睇落都有啲礙眼(你睇隻機頭隻白兵個位幾逼)。再加上$2499.9呢個價錢,我相信都真係要好鍾意《Star Wars》,同間屋有返咁上下大嘅人先買得起啦!


姚基金慈善賽公佈左陣容之後,大批球迷大感不滿及要求退飛,大會隨即再嘗試邀請球星黎講坐陣,最終成功邀請「半人半神」Vince Carter參戰!
hobby
【補飛!】「半人半神」Vince Carter將參戰姚基金慈善賽!
28 Jul 2017
原來馬田斯宜家都只係32歲咋!
hobby
【速度99】退左役?馬田斯原來只有32歲兼喺中超踢緊!
28 Jul 2017