今次消息其實喺韓國舉行嘅「I <3 StarCraft」活動前幾日就已經有跡可尋，事關官網嘅下載版《StarCraft》竟然出現「Sold Out」，當時已經有人估到有機會推出重製版，點知轉頭官方就正式宣布推出重製版《StarCraft: Remastered》，蟲族、人族同神族嘅三國大戰，將會喺今夏再度上演！

Blizzard官網已經更新咗《StarCraft: Remastered》嘅消息，《StarCraft: Remastered》將會包括《StarCarft》同《StarCraft: Brood War》，遊戲玩法同操作都會跟返舊版，但畫質就會大大提升至4K解像度，拉去下面可以睇到原版同重製版嘅畫質對比，上圖係新版，下圖係舊版。重製版將會同時推出Mac同Windows版本，暫定今年夏季推出，售價未定，而本來已經「賣晒」嘅舊版合輯變成免費下載，等大家可以免費重溫，練定等新版，係體貼嘅！除此之外，最近亦有傳《Diablo 2》都會推出重製版，不過就未有任何官方消息。