{ SKIP }
文:MenClub Mean娜  圖:互聯網
POSTED ON 17 Sep 2014

拉麵店喺香港開到成行成市,好唔好食就見人見志。當你以為香港(傳聞)最好食嘅拉麵嚟嚟去去都係「一X」、「X王」呢幾間,其實有間拉麵界新人王強勢登陸荃灣。

據聞呢間「拉麵台風」雖然舖頭細細,但來頭一啲都唔細。除咗香港「X王」店主生田智志推薦過外,佢喺日本開店第一年就被選中喺日本拉麵第ー評論家嘅石神秀幸「石神秀幸拉麵雜誌」上刊登。話說當時冇一間拉麵店可以未過一年就被選中登上該雜誌,「拉麵台風」嘅實力可見一斑。




唔好以為「拉麵台風」嚟香港開店係因為喺日本撈唔掂。自從佢登上「石神秀幸拉麵雜誌」後,風頭一時無兩,但老闆伊東遊唄並無因此自滿,Keep住走遍全日本,希望創造更多新口味畀客人。嚟香港開店嘅原因係因為受到「X王」店主生田智志推薦,發覺香港拉麵店水準參差,伊東先生希望給香港人帶來正宗日本拉麵,於是摺埋喺日本開咗5年嘅拉麵店,帶同日本員工一齊嚟香港發展。而佢喺香港短短年半左右嘅時間,已經得到好多人嘅好評,仲入圍OpenRice舉辦的「優秀開飯熱店大賞」。



為咗令香港人感受到傳統日本拉麵店特色,「拉麵台風」走舊式日本小店路線,不論係金屬吧枱、海藍色富士山壁畫、朝氣勃勃的日本流行歌,都令有時光倒流嘅感覺,彷彿回到日本舊小鎮一樣。唔講唔知,原來日本人食拉麵非常快手,平均15分鐘就食完閃人,唔似得香港心鍾意坐低食成粒鍾,所以香港大部分拉麵店嘅坐位設計都較為寬敞,並選用一般木凳或沙發。但「拉麵台風」就依足傳統日本拉麵小店設計,採用高櫈,不少香港人都唔識就坐,呢個時候侍應會幫手托你上凳,將你連人帶凳推向枱前,仲邊推邊喊「出發!」,非常可愛。跟手仲會幫你掛埋袋,如果女士頭髮長又冇扎起,侍應會送一條橡皮圈畀你扎頭髮,以免進食時一頭秀髮沾上醬汁。



同好多拉麵店一樣,「拉麵台風」同樣會畀張落單紙你,填上合你口味嘅湯底濃度、麵條硬度以及配菜選擇,貼心位係當你走其中一樣配菜(比如蔥),佢就會畀返多啲其他配菜,等你感覺唔會蝕(定還是得小編貪小便宜?!)。


入返正題,介紹「拉麵台風」三款人氣拉麵。


魚介豬骨湯拉麵

魚介指將不同魚燒過後磨成嘅粉,師傅谷津先生話呢款拉麵食法係佢哋獨創,食之前佢哋會教你唔好一下子落晒魚介入湯裡面,先嚐一口用豬骨、豬頭、豬油、雞骨等等熬足成日嘅湯,再加少少魚介,就可以同時飲到豬骨湯真正嘅味道,又可以嚐到加入魚介後嘅變化。小編初嚐魚介,感覺味道似木魚,魚味濃郁,加入濃稠嘅豬骨湯內更覺溫醇的鮮味,而且吊出豬骨湯內的甜味,咸甜得宜,魚介跟豬骨兩者配合得恰到好處。而且湯底濃稠,夾麵很容易就掛起湯底,令麵條更入味,加上「拉麵台風」的麵條水份較少,更吸湯汁。麵條結實有嚼勁,入口滑身且帶著煙韌感。溏心蛋蛋黃呈晶瑩的軟身果凍狀,醃得很入味,吃得出醬油的香與甜。


伊台風

伊台風可說是蕃茄濃湯芝士拉麵,同樣湯底很濃,既有蕃茄的清新,又有魚介的豐厚味道。又大又厚的叉燒上舖滿了用火槍燒焦過的芝士,由於湯底本屬濃味,所以選用較淡味道的芝士,但半溶的芝士不失煙韌口感,夾著油潤的鬆化叉燒非常惹味。


沾麵

沾麵是其中一款日本拉麵的傳統食法,用筷子夾一箸麵條浸入濃稠的醬汁中蘸一蘸再進食,沾麵通常用粗麵條,以燙水將麵條淥熟後「過冷河」,用冷水猛沖,令麵條吃來更彈牙,最後與濃稠醬汁分開上桌,在香港較為少見。


值得一提的是,「拉麵台風」每碗份量都相等於兩個公仔麵,細食人士可Share來食~

地址︰荃灣大河道81號寶成樓地下7號舖

電話︰2419 7717

營業時間︰星期一至日: 12:00-16:00; 18:00-23:00

價錢︰$51-$100

網址︰http://hk.ramen-taifu.com/


對於香港人黎講,打邊爐素來都係不分季節嘅美食,即便係過去疫情期間大家出唔到街,但都可能會買急凍料返屋企食餐好嘅。好似本地網店ChumPlus就曾經於疫情推出急凍牛雜鍋,更大賣超過十萬份。近日佢哋更進駐觀塘巧得 ...
gourmet
【火鍋】疫情期間賣出十萬份 觀塘青藤椒牛雜鍋
21 Jun 2023
近日外國傳媒爆出,以「Salt Bae」之名走紅嘅土耳其籍廚師Nusret Gke,近年身陷多宗與前員工之間嘅官司,當中嘅罪名包括佢「剋扣貼士」、性別歧視、於餐廳內不公對待員工等。令佢原本就唔太好嘅名聲進一步受挫。 ...
gourmet
【美食】剋貼士、性別歧視「Salt Bae」被前員工連環控告
27 Apr 2023