《絕命毒師Breaking Bad》完嘅時候，好多美劇迷都覺得有啲空虛，而當《Breaking Bad》編劇與生父Vince Gilligan 宣佈將會拍外傳故事《Better Call Saul》嘅時候，粉絲們覺得更空虛。「唔係呀化？想榨取《Breaking Bad》嘅剩餘價值？」 

點知我阿Deep睇一睇，咦！唔係喎，呢套《絕命律師》唔單止唔伏，仲有可能比《絕命毒師》更神！以下寫返幾個《絕命律師》吸引位，希望大家有時間睇睇呢套神劇： 

(1)  係人都知個結局，但佢令你想知道中間發生咩事

同《Breaking Bad》一樣，《絕命律師》一開頭已經講你聽，故事主人翁Saul變成點，幾組鏡頭已經顯示，Saul化身甜甜圈小店嘅廚師，過住平凡嘅生活。點解？佢將故事線推至遙遠嘅過去，一步步揭露Saul嘅背景，佢原初只係一個老千仔小混混，喺佢大佬幫助下，慢慢做到律師，但又發生咗好多事，令到佢挺而走險踩法律界線。無錯，佢個劇本就有能力令你明知佢嘅結局，都好想知佢中間發生咗啲咩！ 

(2) 神作角色再Deep啲

除咗Saul《Breaking Bad》塑造好多經典角色，都會喺《絕命律師》度出現，仲會再挖深啲，講返啲角色點會變成咁，例如係打手阿叔Mike、超喪古惑仔Tuco，仲有智慧型犯罪家Gus都會出現。如果睇開舊作，一定會好有親切感，而且會晃然大悟，原來佢之所以變成咁，係因為發生咗呢啲事！所謂神劇，就係令啲角色慢慢企埋一齊，發生事情時，又會睇到各個角色嘅心理反應，《絕命律師》絕對做到呢一點！ 

(3)「好人」如何墮落

總監兼編劇Vince Gilligan最擅長寫一樣嘢，就係一個平凡又普通嘅人點樣一步步成魔？相信有睇《Breaking Bad》一定會認同，佢之所以神，好大程度就係佢做到呢一點！一個老千仔，明明改過自新，努力做返正行仲做埋律師，點解會再自甘墮落，仲慢慢變成幫罪犯走法律灰色地帶嘅浮誇律師。每一個小事件都係一種心理轉化，但說服到觀眾「如果畀著係我，我都會係咁」就係編劇嘅實力，Vince Gilligan係美劇史上最能夠做到呢一點嘅人！ 

小結：係，睇完呢篇文，大家可能會話，有冇咁神呀！但各位不妨上IMDb睇下呢套有幾分，係8.7分！一套冇明星冇強勁宣傳嘅劇，竟然拍到第三季仲有8.7分，好多所謂神劇都係8點幾分咋！信我！睇下第一集，你就知有幾勁！