由領展推出嘅手機應用程式「泊食易」，有齊領展物業內170個停車場、150個商場同超過80個鮮活街市所有商店同餐廳資訊，大家只要開啟定位功能，就可能幫你自動顯示附近車場位置同車位數目，揀好車場之後仲有埋導航功能，非常方便大家搵地泊車食飯。萬一中途車場已滿，更會自動幫你搵最近車位添，夠晒細心。

除此之外，呢個app亦支援領展加入嘅藍牙泊車記錄功能，當大家泊好車之後只要利用藍牙連接車場嘅裝置，就可以記低泊車位置，方便車主搵車，唔使再喺車場入面搵車。不過呢個服務暫時只有樂富廣場、赤柱廣場、黃大仙中心、厚德商場、頌富廣場同H.A.N.D.S呢幾個地方用到，得6個場就少啲，但嚟緊會慢慢加。至於餐廳資料方面，介面都幾易用，而且遲下仲會推出電子優惠券，一掃QR Code就可以得到唔同嘅購物或飲食優惠。