| 「成功需苦幹」，其實根本不用再講，試問哪個成功人士無苦幹過？Gameone創辦人兼董事長施仁毅，20歲創業，成立漫畫分色製版公司「精藝」，數年間就成為業界no.1；及至2000年創辦Gameone，由投資單機遊戲到online game再到手機遊戲，再一次成為no.1，更贏得「香港online game之父」的名號。一生事業離不開ACG（Animation、Comic、Game）的他，認為自己能有今日的成就，原因就是他將興趣與工作結合，只要真正喜歡所做的事，再堅持下去，就自自然然會成功。筆者聽了也覺得總比一味叫人「苦幹」有道理，受教了！ | |
| |
| 連自己也承認童心未泯的施仁毅，對漫畫感興趣，是始於幼年時在內地生活的居所。「嗰時我係住喺一間祖傳落嚟嘅觀音廟，經常有個畫師嚟畫《西遊記》之類神話故事嘅璧畫，細個冇乜人陪我玩，於是就成日跟住佢，跟跟吓佢就當咗我係徒弟，教我畫畫，佢可以話係我嘅啟蒙老師。」當然，直至施仁毅在11歲移居香港之後，迷上了當時大行其道的《龍虎門》、《李小龍》等港漫，才正式與漫畫結緣。 扮返學去返工 每位成功人士總有一段「苦幹」的故事，施仁毅的苦幹故事，大概要由他十二、三歲說起。「嗰時已經出嚟做童工，做過五金、運搬、酒樓，我生得大份，都冇乜人當我係學生。」去到十四、五歲讀中二那年，施仁毅終於下定決心要投身漫畫行業。「我仲着住套校服，直接走去玉郎集團話我想入嚟做，輾轉之間又畀我見到當時嘅總經理祁文傑，佢講笑咁講咗句，話睇我個樣都唔係讀書㗎喇，就問我幾時可以返工，我答聽日，跟住佢就叫我第二日返工。」不過由於當時寫畫部沒有空缺，施仁毅被安排到分色部工作，「只要同漫畫有關我都做！」當時他問都沒問過父母，就這樣穿着校服扮返學，其實去了返工，一星期後學校才通知他父母，結果他被打了一餐後就正式輟學。 | |
| |
| 在玉郎集團的分色部做了4年，施仁毅未到20歲就做了分色部的阿頭。既有感要學的都已學晒，更因為玉郎集團上市，他內部認購股票賺了一筆，再碰啱有朋友找他合作，於是施仁毅便自己創業，成立了「精藝」，但其實這可算是他人生中唯一放棄理想的一次。「因為我係大仔，點都要幫手養家，所以我爸爸媽媽從來都冇支持過我做漫畫。而我應承過佢哋一定會搵到食，於是就要選擇，放棄咗成為漫畫家嘅志願，改為做啲同漫畫有關又搵到多啲錢嘅嘢。」 冇生意捱麵包 不過事與願違，施仁毅在創業初期經歷了人生第一個最艱苦的時期。「因為嗰時玉郎係一統天下，我哋只能夠接到啲細出版社嘅生意，數量好有限，同埋係豬頭骨價錢。」施仁毅還應承過家人，自立門戶後畀的家用，不會少過打工時，即使收入減少到要捱麵包，依然履行了這承諾。不過家人始終是最大的支持，「我爸爸問我有冇錢，我一定話有，但佢會靜靜雞摷我銀包，見到冇錢就會塞啲落去。」及至88年之後，馬榮成等漫畫家相繼離開玉郎集團自組漫畫公司，港漫行業變得百花齊放，「精藝」才能接獲更多漫畫後期製作及分色製版的生意。施仁毅堅持了兩年，不止捱過難關，更掘到第一桶金。
| |
| 首次轉型做出版 現年48歲的施仁毅，說他的30多年事業生涯中，約可分成3個階段，頭10年做漫畫，中間10年轉型做出版，近10年則做game。第一個轉捩點要數93年，「當年黃玉郎出獄，復出搞玉皇朝，再因為祁文傑（當時再任玉皇朝總經理）嘅關係，畀晒玉皇朝漫畫我哋做，我根本唔使再搵生意，多咗好多時間出嚟。」於是施仁毅便開始利用「精藝」賺得的資金，開展另一門出版生意，繼出版過漫畫、延續了他的漫畫夢之後，97年還創辦了全港首本電腦遊戲雜誌《PC Game Weekly》。「嗰個真係報攤嘅年代，啲書好好賣，我睇中咗香港冇呢類雜誌，於是想搞番本，結果發覺原來幾好搵㗎！」 | |
| |
| Gameone兩次差啲執 因為辦了遊戲雜誌，本身也是game迷的施仁毅，了解到這行業的環境後，便萌生做game的念頭。98年，他終於由玩家變成投資者，開始投資PC單機遊戲，00年更成立了Gameone，再因應02年online game及10年手機game興起，緊隨市場轉向發展這兩種遊戲。還因他與港漫圈關係密切，所以經常與漫畫公司合作，拿取版權製作遊戲。但他坦言Gameone這十多年來絕非順風順水，期間更兩次差點倒閉。 「其實做遊戲開發風險好大，因為投資周期好長，今年將所有資金掟晒落一隻game裏面，隻game得就話啫，萬一唔得嘅話，下年可能連run間公司嘅資金都冇！有一次我哋決定由遊戲開發公司，轉型做遊戲供應商，自己代理埋遊戲；另一次因為公司擴展得太快，兩次都搞到公司喺外面嘅債務，仲多過公司嘅資產，變成負資產！」猶幸這兩次難關，最終又因他堅持到資金及時回籠而順利渡過。 | |
| |
| 下一個10年做策劃 但是施仁毅自言是「創業人」，不喜歡停下來實質運作一間公司，所以當Gameone上晒軌道之後，他已經在籌劃事業的下一步。「我鍾意搞起一樣嘢之後就交畀人，自己就走去玩第二樣嘢。下一個10年我會做結合ACG嘅嘢，仲會參與埋影視，以策劃多媒體項目為主，希望做到品牌式經營，發展大陸市場。譬如我攞到一個版權，就可以搵其他公司合作同投資，出晒漫畫、小說、電影、遊戲、精品所有嘢。」由他策劃的第一套港漫改編電影作品《野狼與瑪莉》，將於下年上映，另外他還正在策劃《古惑仔》、甚至改編倪匡小說的電影，雖然百足咁多爪，但始終不離他最鍾意的ACG本行！ | |
| |
先唔好諗發達 | |
| |
| 後記 施仁毅說喜歡人叫他「風老總」多過「施生」，因為比較親切，這是他擔任雜誌總編時的筆名，源於他玩《鐵拳》時最愛用「風間仁」一角。而筆者在他太太的facebook中，就見她稱呼他為「相公」，相當恩愛，在訪問當中，施仁毅也多謝了他太太在「精藝」創業初期，跟他一齊捱麵包、在公司煮飯食。或者老套一點講句，男人要成功，看來背後真的還需要一個默默付出的女人。 | |
