沈旭暉話當年考完會考去外國留學，因為自小就不喜歡香港的社會氣氛，覺得這個地方似「唐人街」。

終於來到沈旭暉(Simon Shen）口中的「私竇」。

Simon話未婚前一個人住，好自由，而家初為人父，陪月、工人、太太、媽媽、外母，經常出入家中，所以好需要有個私竇，有番私人空間，這個竇入伙不久，CD格還未爆滿。

我說了幾個似層層的答案：例如話多年前無意中透過電台節目《光明頂》，認識有沈旭暉這位學者……我承認我too simple，sometimes「賴依芙」，總覺得他是既有學術權威，又蠻過癮的公眾人物，可以讓共眾在其facebook「善意地取笑」。講真，可以「咁樣畀你玩」的本土學者有幾多個？五隻手指可能也用不上。

作為路人甲乙丙，我一點點用猜的態度去想，他是為吸引更多人了解國際關係這門學術才有限度地嘩眾取寵，辜勿論事實是否如此，他已成功地「入屋」。至少，像我媽這種家庭主婦也知道，除了《交易現場》的「沈大師」外，香港還有一位經常上電視的「沈大師」，他叫沈旭暉，在中大教國際關係的，而她不知道甚麼是國際關係。

我問他肯接受MenClub訪問的原因。
他說：「我知道有呢個網好耐，但我都係近期先add你哋Facebook嘅⋯⋯我啲friend成日share你哋網嘅link同相」我問：「事業線相？」。真正原因詳見本文結尾。

如果你近年有follow沈旭暉facebook，都會覺得這位中大社會科學院副教授，偶爾「曲線地口花花」，年多兩年前經常提及官恩娜、之後有網民經常掛在口邊的「南韓女外交官」、還有去年年底的「涉谷之旅」，間中又拋幾句跟日本AV女優名字語帶相關的打油詩，網民本著尋開心和趁熱鬧的心態搏命「喪re」，「Like數」少則數百，多則三千（https://www.facebook.com/shensimon/posts/877459235621561?reply_comment_id=877516822282469&total_comments=1）。不過，當提到嚴肅而冷門的國際話題，網民反應明顯冷淡，即使有，都是一句起，兩句止，或十個字以內的comment。

訪問當日，Simon的小寶寶還未滿月，問他對孩子未來的期望，他以「隨緣」總結，「連自己嘅發展都plan唔到，點可以plan埋佢，我覺得結婚生仔，已完成對社會嘅責任，對家庭已盡責任，對自己亦已盡咗責任。」「我喺呢個mainstream嘅遊戲玩咗10年，都叫做有啲成績，但心底裡認為唔係成世都係咁，而家係時候做番想做嘅嘢，否則係好本末倒置。」

我突然問Simon：「你今年幾歲？」

「好老嘞，唔好提年紀呢啲嘢。」

循例我都要問Simon在婚前多唔多女性主動趨前結識。佢話青年才俊始終有market喎，明明明。

他多次強調每個人有自己獨立的性格、人格。「我細個父母好關心我，但有時over咗，氣氛係好典型的中產家庭，對子女有一定期望。去到外國之後，當你有一個人嘅空間，開始搵番自己嘅character，會發現世界好大，你知道自己想點樣。喺香港好壓逼，要參加好多人哋期望你
嘅嘢。」

聽落好似會有另類大計或抱負，教授啊教授，有否想過有日不再教學，會有任何發展？

「番香港係機緣巧合，放暑假、獎學金要求、有份工請、當時嘅女朋友，一抽（他本以一籃子形容）嘅因素，其實喺嗰邊（外國）會係另一種嘅人生，發展空間會大好多，好玩好多，香港畢竟係一個好細嘅地方，亦係一個好狹獈嘅地方。我亦唔特別鐘意學術界，我只係鐘意一啲
subject matter我喜歡研究嘅嘢，唔喜歡學界嘅生態，但我玩到呢個遊戲，咁佢哋吹我唔漲。」

Simon想到外國讀國際關係，源於會考後，而對國際政治有興趣，更早至小學年代（整定食呢行飯）「自己鐘意嘅嘢，香港無出路，文科出身，讀國際研究，香港做呢啲嘢，讀呢啲嘢，直啲講句係冇社會地位，主流社會唔係咁認同，屋企同朋友都係咁諗。」

「真係咁差？」

「呢啲冇得避，你可以講好多好聽嘅說話，理想、理念。」

「客觀上，呢度社會就係個單一價值觀，外國有好多叻嘅學生讀呢類科目，出到嚟亦有幾好待遇。所以當年覺得咁唔係辦法，走到就走。另外，亦好受爸爸影響，佢喺英國讀書，我亦聽英文歌長大，自少唔喜歡香港社會嘅氣氛，覺得好似一個『唐人街』，希望見識真正嘅世界。」

Simon所指的「氣氛」，就是對世界缺乏好奇，對周遭事情只有單一價值觀，咁，有冇講中你？

身為中大社會科學院副教授，他坦言在香港讀social science科目，未必能在畢業時找到對應的工作，「有啲學生會到國際NGO工作，又或到外國升學，加入當地Think Tank，數落有唔少出路，但就唔係一般人搵嘅『大路工作』，肯出國肯去外國嘗試，就會有更多可能性，如果淨係望住香港，睇住jobsdb嗰啲工，咁就好冇意思。」

未知是Simon近日剛榮升老豆無覺好瞓，抑或有其他原因引致他黑眼圈，究竟他現時一日瞓幾個鐘？「近一年半，朝早七點零起身，八點會用Skype上日文堂，因為老師喺日本，要就時差，通常凌晨三、四點瞓。婚後半年曾經hea過，直至到佢（太太）懷孕呢個噩耗出現之後，我
發現係個警號，會無晒自己，需要tune番自己所需嘅生活，所以瞓少咗。結婚之後，我曾經諗過係唔係可以好安逸咁生活，每日準時放工番屋企睇《愛回家》，跟住食飯、瞓覺，我試咗半年，發現唔得，而且好痛苦。」

「你會睇《愛回家》？」

「一、兩集，我真係頂唔順，呢個係事實。」

睇facebook發現，Simon可以時「漲」時瘦，究竟搞乜。「最近兩個月keep住跑步，節食，就算早排傷咗腳，都keep住跑半個鐘，虐待吓自己，咁第啲嘢自然都可以有恒心。」日前他在fb share新加坡國立大學的李光耀金句 “If you want to reach your goals and dreams, you cannot do it without discipline” 「我哋呢啲懶係藝術化嘅人，通常最衰就係冇discipline，所以我要逼自己有。」

「我以為你好有紀律添！」

「我要令自己有，因為我個底冇嘛！我係唔鐘意紀律，但係你要喺社會生存，更加要train自己。例如會用excel、用表去管理自己，去逼自己做一啲唔想做嘅嘢，好似我唔鐘意應酬，我就逼自己交換夠10張卡片就走人。用錢方面，我有三個表，計每日用錢、每日做過嘅事，同每
月儲幾多錢。」

我同攝影師多次希望Simon能夠有個寬容啲表情，或許性格使然，佢有啲緊張。我突然想起賭神對龍五講：「你可唔可以破例笑一次畀我睇」龍五話：「唔得，因為我笑得唔好睇。」

Simon回憶在外國求學的三、四年好自由，暑假可以玩到好放，喺bar亦識到可以玩到好癲，在音樂理念上有共同話題的女性朋友。不過，他坦言很清楚這類「朋友」不能與自己共諧連履，締建安穩家庭。Simon的太太是他口中「賢良淑德」的好老婆，在很多事上都體諒遷就，「佢
有超過90%係understandable，呢樣我好appreciate」，但在籌備婚禮時，也曾發生過令他至今仍氣憤的小插曲。

「我太太係教徒，而我好厭惡宗教傳銷。佢嘅教友因為我唔係教徒，而唔准我哋結婚，有一大批人更杯葛唔出席婚禮。佢best friend因為我唔係教徒而拒絕做伴娘，我心諗，我媽（Simon母親都是教徒）都未出聲，你班「茂利」憑咩出聲？我到而家條氣都好唔順，你哋憑咩去
comments其他人嘅私生活，所以我對呢一type思想嘅人十分之反感。當然，並非每個教徒或教會都係咁，但好多時用一個方式，去搵到自己喺現實社會搵唔到嘅重要性，重新建立一個hierarchy，咁其實十分之虛偽。我同佢講過好多次，但每次都係嗌交。所以，算！」

「但我最後都妥協，喺中大嘅教堂行禮，我本來想玩嘢搵個法師或伊斯蘭教長為我証婚，但係佢玩唔起。」我真的懷疑阿嫂會否在婚後以漸進方式逼Simon就範，要求他周日上教會。「如果係咁就結唔到婚嘞，大家有共識，唔好同我傳教。」

沈旭暉常說愛自由，觀乎目前本港政治氣候，我問他估計10至15年後會否仍住在香港。

「前兩年好積極咁諗過移民，主要考慮台灣同新加坡，比較容易適應，而我嘅network同expertise亦比較易transferable，所以呢兩個地方我都去得好密，好刻意去鋪路，亦都唔難進入佢哋嘅圈子。我暫時嘅結論係，會留守到最後一刻，但亦都要確保去到佢哋嘅地方，所以會喺呢兩個地方有個base，同佢哋嘅學校有啲定期合作，係體制入面，而非純粹visiting，有少少監督上的角色，同佢哋做一啲常設項目，當係佢哋一半嘅自己人。我要喺當地有社交圈子，認識當地傳媒人、文化人、音樂人，寫專欄，而呢啲全部已經做緊。所以，我每年都會喺呢兩個地方住一段時間（約一個月），其餘留喺香港，直至住唔到人先算。」

「點先為之最後一刻？」

「留守到我頂唔順。」

「你指政治氣候？」

「不止政治氣候，政治我睇唔過眼，亦唔喜歡而家嘅氣氛，呢個係事實，但呢樣嘢唔會強烈到令我想走，因為我唔係從政，亦都唔想從中攞啲咩嘢，我可以唔理佢，好多人都係咁。我真正覺得唔舒服嘅係，呢個城巿好想洗人腦。你行到邊度，都只得一種價值觀睇你，我讀呢科，傳統上就係得唔到社會尊重；阿媽淨係叫仔女做某一行，學校淨係叫學生讀某一科，TVB就係咁㗎嘞，師奶就係咁講嘢嘞，如果成世都係呢個氣氛，我會覺得好似坐監，而呢種氣氛係嚴重咗 。」

他認為，能夠形成上述的「氣氛」，固然同政局有關。「隨住政局愈來愈兩極化，劣質政治會出現一啲愚民政策。以往我哋覺得不合理的，亦因為愚民政治而被合理化，例如亞視嗰啲咁嘅節目，咁都可以有人撐，呢啲有違common sense；無線嘅劇集，雖然唔係全部咁差，但無可能每套劇都係同一樣公式，對白亦假到無倫，咁究竟發生咩事？而無線亞視係本港僅有嘅兩個免費電視台。咁樣落去，你嘅一生人會白過。」

Simon認為，無需將移民視為非黑即白的概念，「我上堂成日講，喺全球化時代，居住、工作、玩樂，攞個passport周圍去，可以分得好開。如果我哋可以喺幾個鐘意嘅地方有個base，可以reach到global層面，咁拎咩passport都變得次要，走唔走都唔重要，我而家嘅目標就係咁
。」

兩年前積極考慮移民，但始終冇走。佢話：「我暫時嘅結論係：會留守到最後一刻。」

目前沈旭暉一身三職，大學教學，信報主筆（國際）及顧問工作，三方面收入相若。我嘗試八卦他的消費模式，「有冇玩車？」「冇，嗰啲太大消費，我揸Toyota。我寧願買CD、買書，食有特色嘅食物，去有特色嘅旅行，搞cafe（聞說已在銅鑼灣租舖）、搞旅行社。」

「就算蝕錢，我都要蝕得型！」嘩！呢啲算唔算霸氣？

「所以，我要搵多幾份糧嚟sustain呢啲開支。另外，我請咗好多assiatant，呢方面開支好大，以前好多人幫過我，當力所能及，幫番志同道合嘅朋友。」

即使經歷金融海嘯，銀行廣告或好多七、八十後仍經常嚷著五十歲前或早至四十歲退休。Simon話無想過退休，「唔可能唔做嘢」他認為退休的真義：在於無需為兩餐去「chur」，因此應該將目標放在如何令自己多做想做的事，那就會比退休更享受。

「咦！咁第時會有旭暉旅行社喎！」

「做到梗係好，旅行社、Cafe，係好多人成長過程嘅夢，有間cafe、有隻貓、有堆書，播自己鐘意嘅音樂，專攻一、兩個關心嘅議題，識自己想識嘅人，咁嘅生活會好完美。呢啲Cafe規模其實好平，我同台南一個香港人傾過，4000蚊月租，地舖連二樓⋯⋯」

上得MenClub訪問，梗要講女人。我請Simon講講他眼中香港鄰近地區的女性

1.最易相處－台灣－說法口音特別有韻味，例如唷！（他唷了一聲，如果受訪者ok，我哋可以播畀大家聽）

2.最功利－中國大陸

3.最長氣－印度

4.最cool、最串－新加坡

5.最靚－混血兒

喂喂！咁南韓女外交官呢？

好喇！講番Simon話接受MenClub訪問其中一個原因。「要盡量crossover不同界別，可以是音樂、電影、足球、娛樂圈，可以是AV，任何東西都可以。」「如果我喺任何一個生活層面都滲到國際關係嘅message出去，咁你睇條女，都諗吓嗰個國家喺邊，咁我都覺得盡咗本份，我覺 得好偉大喎！」

旭暉兄，你真偉大。

相信呢張相日後會經常被沈旭暉fb fans喪用

沈旭暉的二、三事

1.怕講電話

2.鐘意打鼓，因為可發洩情緒

3.早年考獲八級鋼琴資格後，之後「無掂」好多年

4.近期有時間學Jazz Piano，希望將來出專輯

5.去過80個國家，希望有生之年去齊所有國家