呢部咁強嘅吸塵機Piccolo係由德國生產商Hammelmann Werke製造，當時值成25鎊已經係好貴，但估唔到咁多年之後都仲用得，真係乜都抵返晒。話說呢部機係屬於61歲英國嬸嬸Mary Waite，喺1976年結婚時，佢老公嘅親戚就喺倉底搵到呢部接近未用過嘅古董出嚟做賀禮。

由1925年擺到1976年先用都已經超過50年，著唔著到都成問題啦，點知Mary開機一用就用足咁多年，事關Pciccolo唔單止可以用嚟吸塵，裝上轉接器後仲可以磨咖啡、攪肉、攪拌食物同噴漆，兼且咁多年都冇壞過，成為Mary做家務嘅好幫手，結果一直用到依家。1925年係咩環境？英國仲係英女皇亞爺喬治五世在位，而德國就簽定《羅加諾公約》成為歐洲大國之一，至於香港當時就因為省港大罷工而變成臭港。