| 雖然打乞嗤係好自然嘅生理反應，但喺規範多多嘅人類社會中，打個乞嗤都要睇場合，有啲場合如果突然大大聲打乞嗤，確係非常失禮，呢個時候應該點做？咪就係忍住個乞嗤唔好打出黎。不過唔好以為忍乞嗤好閒啫，對身體唔會造成咩大影響，事實上，忍住唔打乞嗤係有可能對身體造成極大傷害！ |
|
 |
|
《英國醫學期刊病例報告》（BMJ Case Reports）期刊就登過一個病例，指一名英國男子就係因為想打乞嗤時會捏住鼻，以及緊閉嘴巴去忍住唔打乞嗤，結果頸部感到不適，覺得腫脹嘅頸部內有爆裂嘅感覺，後來發現佢因為忍乞嗤而導致喉嚨撕裂，氣泡已經滲透胸腔，要接受靜脈注射抗生素，並且只可以靠鼻胃管灌食。 除此之外，當你忍住乞嗤時，氣壓有機會被逼衝向耳仔，甚至衝破耳膜，導致嚴重頭暈，或者聽力受損。而呢股氣壓都可能將感染嘅黏液推入耳咽管，引致中耳炎。更加嚴重嘅，強忍乞嗤可能會令你頸部受傷，甚至出現暫時性尿失禁。而且當你忍住乞嗤時，血壓會暫時性升高，如果你有輕微嘅心血管疾病，呢下一壓力有可能導致血管破裂，或者眼眶出血。 醫生就勸籲，想打乞嗤時唔好咁大聲，就用紙巾掩住口鼻，唔好用手捂住口鼻，或者用手捏住，呢個行為係相當危險，仲解釋話，喺罕見情況下，咁做仲會令空氣堵塞喺肺部，令腦動脈瘤破裂添！ |