人類對太空嘅初步探索，莫過於將林林總總嘅東西射上Moon度，從1950年代嘅第一輪探月活動，到近代強國嗰堆嫦娥X號，地球人對月亮嘅熱情係從未止息；即使戰鬥民族嘅月球移民計劃常未成功，美國已經有堆後生仔想喺月球度釀製啤酒! 美國US San Diego有班學生拎住呢個idea參加Google嘅Lunar X Prize，並已經確定進入最後25強，呢個瘋狂嘅想法好有機會成真。 |
|
班學生嘅隊名叫「Team Original Gravity」，如果你睇到個名而識得笑，咁已經證明你對科學、釀製啤酒有初步認識。佢地一開始都係好似大家咁，圍內吹水發吓夢，話想試下月球重力之下，對於酵母菌嘅影響有幾大，同埋想知喺月球釀酒會唔會好飲啲，點知大家愈講愈認真，仲做好哂計劃書去參賽添! 是咁的，Team Original Gravity嘅想法係送一個汽水罐咁大嘅容器上月球，呢個罐分成3個部份，第一Part裝有未發酵嘅原液，而第二Part則裝有強力酵母Hothead，送到上月球之後，中間嘅閥門就會打開，令兩者融合，當發酵到一定程度，第三Part嘅閥門會打開，令酵母同發酵中嘅啤酒分離。 |
|
講落好似好簡單，但喺月球釀酒係有好多問題要解決，例如月球重力只有地球嘅1/6，佢地需要用測量壓力去代替傳統以密度判斷發酵程度嘅方法，另外仲要確保有足夠嘅氧氣進行發酵，做到有泡沫嘅啤酒，但又需要控制二氧化碳嘅排放量，以防止個罐會爆開，即使理論上「Moon Beer」可行，但實行起嚟又係難關重重。 |
|
Team Original Gravity嘅月球啤酒喺3,000幾份計劃書之中脫穎而出，成為最後25強，而佢地嘅對手仲有「月球瀕危動物基因儲藏庫」、「月球種植計劃」等等；而Lunar X Prize就計劃喺2017年12月28日發射第一個登月球飛行器，所以年底前就會知道Moon Beer係咪會成真。不過，即使個容器真係送咗上月球發酵，其實暫時係未有回收計劃嘅，所以到最後都未必會試到未，不過月球一小步，即是人類一大步，相信於不久嘅將來，地球好快會有Made in Moon嘅靚酒賣! Source : GrubStreet |
