{ SKIP }
文:MenClub 波特先生  圖:MenClub
POSTED ON 09 Mar 2018

喺宜家嘅香港搵食真係好艱難,而喺香港做全職運動員就難上加難。不過,仍然有唔少人願意投身去自己鍾意嘅運動,無論面對幾困難嘅局面都仍然可以堅持落去,去為香港爭一口氣。今日呢位主角就係曾經歷香港足球嘅「冰河時期」,再見證住香港一條心支持香港隊嘅香港足球代表 - 林嘉緯。

現年32歲嘅林嘉緯,年幼時都可能好似你同我一樣,踢下街場鍾意上腳扭下波,不過佢就可能同我地有啲唔同,因為佢成功比人發掘其足球才能。不過,講到尾佢都係15歲先開始加入青年軍,接受正式嘅足球訓練,相比起其他人佢已經係較遲起步。不過正所謂有心唔怕遲,嘉緯繼承左父親優良嘅足球因子,並被當時嘅教練黎新祥揚言將成為香港隊未來嘅中場核心。
適奉出道之時正值香港足球界嘅「冰河時期」,嘉緯直言當時球員嘅人工可能只有幾千蚊,而入場睇波嘅觀眾亦都可能只係得100人,而100人入面其實只有20-30人係真係比錢入場,試問全世界有邊一個球員想喺咁嘅環境下踢波呢?
不過,近年香港足球有復甦跡象,多左唔少球迷入場睇波,而香港隊嘅主場比賽甚至全場爆滿,嘉緯亦担言感到驚訝,並道出有球迷支持其實好大分別。
「始終自己都踢左好多年香港隊,都經歷左香港隊嘅高潮低潮,尤其係低潮嘅時候,球圈氣氛真係會影響到球員嘅士氣。那個時候沒有太多人會留意我地,比賽時都不覺得代表緊香港。到後來香港足球開始復甦,多左球迷入場打氣,就算球隊落後球迷都會繼續打氣,呢一點令我地可以保持住士氣,所以球迷嘅支持我地係感受得到,亦對我地非常重要的。」
而講到最難忘嘅一場比賽,嘉緯表示係去年亞冠盃外圍賽面對越南河內個一場,因為當時雙方踢到加時120分鐘仍然平手,但就喺補時階段嘉緯以頭搥成功破網,助球隊絕殺對手,並且順利晉級。除此之外,嘉緯亦指呢場比賽為自己吐氣揚眉,因為以往自己經常被批評只有70分鐘氣,體能不足,但今次踢足120分鐘兼貢獻絕殺,令佢覺得意義非常大。

相片來源: 傑志

 

正當以為對越南河內呢一個絕殺係嘉緯最難忘嘅入波,佢就話當年對曼聯嘅表演賽個球遠射先係。嘉緯表示:「因為始終對手係曼聯,可以喺咁多球迷面前,再加上咁嘅氣氛去面對世界級嘅球員,自己能夠入到一球咁靚嘅波,到今時今日都仲好記得當時嘅畫面。」呢一球真係靚得好緊要,唔講真係以為睇緊英超呀。

講到自己足球嘅成長,嘉緯表示以往自己好鍾意扭波,因為覺得好型,成功扭過對手就好叻。不過佢被當時嘅教練問左一個問題:「你覺得如果你帶住個波,喺半場扭去底線快啲,定係我踢個波落去快啲?」然後嘉緯就不斷咁諗,佢覺得教練係想佢明白要清楚自己應該幾時扭波幾時傳波。就係咁,當佢踢進攻中場嘅時候佢就明白到單扭係無用,一定要知道咩時機做咩嘅野。
最後,問到世界級球員前世界盃金球獎得主科蘭呢位傑志新兵,嘉緯認為對方無乜架子,對足球非常認真,同時唔會令人覺得有「世界級球員」同「香港球員」嘅分別。而最令嘉緯佩服嘅就係其射術,佢甚至用恐佈黎形容。而自從科蘭加盟傑志後,嘉緯笑言自己對罰球亦都低調左,不過佢就講左自己一件趣事比我地聽:「科蘭岩岩加盟頭一個星期,我地大家練習完一齊留低射罰球,開頭見佢射嘅時候好似唔係咁好,好似唔係好有力,唔係好叻姐。不過當然知道佢當時只係未入狀態,過左一個星期之後佢就喺比賽入左3個好靚嘅罰球,證明只要佢有狀態係真係好恐佈的!」

相片來源: 傑志

 

(完)

Editor: 波特先生

Video: Dave @ MenClub

人們常說「演而優則導」,看看剛剛過去的香港金像獎最佳新導演的提名名單,這似乎是近年香港電影界的常見現象。而要說「演優」的男演員,由當年的「化骨龍」演到拿影帝的「洪荊」(《証人》)和「賤輝」(《激戰》) ...
people
正義很易 - 《低壓槽》張家輝、林雪、張繼聰
03 May 2018
做女教練其實真係一啲都唔容易!
people
【不甘示弱】女田徑教練 - Lily Lee
12 Apr 2018