{ SKIP }
文:MenClub Mean娜  圖:MenClub
POSTED ON 30 Sep 2016

「窮途後再生 開一塊荒土盼黎明時份」係周國賢新歌《今生不回家》裡面其中一句歌詞。「唔知由幾時開始,我唔再define自己係一個歌手……」曾捲入情緒風暴,歷盡浮浮沉沉,周國賢重返樂壇後,似乎變得有啲唔同,有人話佢少了點「熱血」,有人話佢缺了點「離地」,其實佢只不過重新去做自己「我將自己變咗係一個傳播媒介、藝術工作者。我寫嘅歌都係想將我嘅世界帶畀一啲有心人。」





當年周國賢患上情緒病,可以話係佢人生低潮。可能好多人都唔了解情緒病嘅可怕,以為只係唔開心、好唔開心同超級唔開心,而忽略呢種心病可以徹底摧毀一個人,讓人沉淪到不能自拔「有情緒病最恐怖嘅地方唔係佢有幾dark,而係你有幾enjoy自己沉喺個dark度,因為會上癮。」


然而當中嘅抑鬱感覺只有自己明白,如果其他人想夾硬將其抽離於黑暗之中,反而會令情緒病患者更加痛苦「有情緒病嘅人最唔想聽到嘅說話係『你開心啲啦~』、『你可唔可以bright啲啫!』因為可以揀嘅話,佢哋自己都唔想咁嘅。同埋有時唔需要一啲好positive嘅人喺隔離,講好多正能量嘅說話,有時其實唔好講嘢,淨係喺身邊陪住佢,已經係好好嘅鼓勵。」





偏偏對創作人而言「愈愁愈有靈感」,周國賢對此絕對認同「我有個artist朋友都患過情緒病,佢話負面情緒同正面情緒有分-1、-2、-3、-4,最極端係去到-5,咁好似話去到-4嗰啲已經返唔到轉頭。但係最吊詭係你創作靈感最澎湃大約係-1嘅時候,有少少憂鬱,見到個天落雨會覺得『好浪漫……』」


或許因為呢個原因,當時周國賢創作出唔少歌曲,縱然唔係首首都同情緒病有關,卻少不免染上一抹哀愁,令人聽畢有種戚戚然嘅感覺。而《今生不回家》就係咁嘅一首作品。重新整理自己嘅內心以後,周國賢嘅歌曲更貼地,同我哋嘅生活更息息相關。雖然《今生不回家》單睇歌詞,好似係純講戀人分居,由熟悉到陌生嘅故事。但其實內裡隱藏周國賢對現今香港嘅心聲,亦可能係大部分香港人嘅心聲。








周國賢憂鬱過後,由多倫多重回香港呢片土地,卻有種陌生感覺。「《今生不回家》呢首歌其實好想帶出一個訊息,到底屋企係咩嚟呢?屋企未必係一間屋,可以係一個你好熟悉嘅人,或者係一個好熟悉嘅國家、你長大嘅地方。但呢首歌有好多無奈喺入面,用關係去講就係……有一個同你好熟好熟嘅人,你哋曾經共過好多患難,以前乜嘢都會傾,但係而家唔知點解隨住時間嘅流逝,好似兩個都變到冇嘢講,又唔知有咩嘢變咗,又唔係個關係完結咗,但係好似已經唔係以前嗰種感覺……個人仲喺度,但裡面嘅嘢已經唔同咗。如果用地方去講,就好似而家我哋呢度……」冇錯,講嘅就係我哋嘅香港。


「我好鍾意呢度(香港),呢度亦係我打算終老嘅地方,但係好多嘢已經唔同咗,就好似而家好多學校嘅mother language都唔係我嘅mother language,用嘅字體亦都有啲唔同咗。咁所以……有少少無奈,好似對住一個變咗心嘅戀人。」再回想周國賢嘅一句︰「我寫嘅歌都係想將我嘅世界帶畀一啲有心人。」從悲傷中再生,周國賢唔再只係歌手,未來究竟有咩打算?「我想令大家認識音樂以外嘅周國賢,所以我11年開始拍mv又好,而家剪片又好,都係為我未來嘅電影世界鋪緊路。」周國賢嘅歌一直打動人心,期望再生嘅佢,可以透過電影感染更多有心人。


Credits:
Location :Azure Restaurant Slash Bar
Video︰Dave@MenClub
Photo︰Sam@MenClub


十九年前的《寵物情緣》好看吧?十九年後古仔跟寵物合作,這次不是狗而是貓,而且一樣大賣溫情,你又會不會入場支持?
people
再續寵物情緣? - 古天樂、犀犀利
10 Jul 2017
哭並不丟臉;自私並不可恥,何必為了滿足別人而迫使自己強作開朗?
people
給陽光小姐一點陰霾——糖妹
10 Jul 2017