提到雨僑，首先你會諗起佢邊個身份？歌手？演員？節目主持？定youtuber？今時今日做藝人，只得一技傍身並唔夠用，而係要周身刀，仲要張張利。講到時下多才多藝嘅Artist，雨僑一定有份，雖然對比一眾入行已久嘅老前輩，好多人都覺得雨僑各方面尚有進步空間，但無可否認，雨僑一直好努力去增值自己，務求成為各項技能「張張利」嘅多棲類藝人。

雨僑打從入行時，人人都知佢係會考26分嘅港大畢業生，仲有八級鋼琴證書，喺香港藝人中，都算威威；而入行後，羽僑除了歌手身份外，仲會拍戲以及拍片同大家分享美容心得，縱然雨僑本身非常叻女，但人總有自己唔擅長嘅事吧？問到當中邊樣對佢而言最具挑戰性，佢就認為與其揀一項，不如話係同時做咁多項。「演員或者youtuber呢樣嘢係容易去balance，因為好似青雲哥哥咁，佢唔拍戲時可以去九龍城買雞；我唔做youtuber我唔做演員時，我放假去買餸都冇問題。但如果你係歌手，或者以往大家畀歌手嘅一個包袱，就好多嘢都唔太做得，咁我就會日日畀人佈置得好靚，然後去電台電視台報紙雜誌做訪問，咁樣根本冇生活養分去同人分享，所以我覺得演員加youtuber係容易嘅，但再加埋歌手，就難嘅。」雨僑仲強調，平衡三方面最難係如果完好無缺好似barbie出現嘅同時，又有好多生活經歷去做演員，仲有閒暇去寫column同拍片，可見家下藝人真係唔易做。

雨僑近年多咗參與電影演出，初踏入演圈直至現在啪住劉青雲同謝霆鋒拍《驚心破》，雨僑目前為止覺得演戲最難係咩呢？「可能因為我嘅人生路比較平坦，一讀完書就簽咗公司，跟住就做嘢。咁可能較早階段，好多嘢我冇咩領悟，唔係話扮就扮到，有好多情緒未經歷過，唔係咁容易表達到出嚟。但係呢樣嘢還好，因為隨住你人慢慢大，經歷嘅嘢多，痛嘅極致、開心嘅極致、傷心嘅極致，每一個情緒你都reach到，所以我覺得呢樣嘢係會愈來愈好。」

咁今次《驚心破》雨僑演嘅角色係點，佢就話係演一個比較低級嘅警察，所以有好多資料性對白要背，去匯報上司。不過聽講呢次雨僑都有三點式演出，有冇話自己演戲其實有咩底線先？「作為一個演員，應該要有好多唔同嘗試，但個問題係做唔同嘗試時你會有選擇，而呢啲選擇我諗係同你人生去到邊個階段掛勾，雖然so far我遇到嘅電影唔係尺度好大，或者好誇張地性感，但係我覺得呢一刻我唔會特別去諗底線，因為有啲嘢好多時我覺得後生唔做，第時就冇呢個選擇。咁所以我唔會去限制自己嘅選擇。」

演戲路上，雨僑有自己嘅一套睇法，而佢亦都表示未想想挑戰更深層次嘅角色，比如可以係會有成長嘅角色。「我想做嘅角色係演得比較長時間，我之前演嘅角色都係演緊一個……人嘅生命中較短嘅時間。我想演一個角色係……無論真定假都好，都可以演佢一個長啲嘅時間，由嗰個人嘅後生，到經歷一啲轉變，到經歷10年20年時間，咁我未試過呢啲角色，都好想試下。」

又老實講，如果雨僑所做嘅一直冇成果，早就喺芸芸藝人下被埋沒，你又點會知佢係邊個呢？連名都未聽過添啦。

Venue︰Greyhound
Video︰Dave@Menclub
Video editing︰Nam@Menclub
Photo︰Sam@Menclub