在家靠父母，出外梗係靠朋友。工作或生活，很多事情都好難一個人能夠處理得晒，少不免要搵同事、朋友幫忙，但搵人幫手唔代表人地一定要幫你，有咩方法可以提高人家幫你手的機率呢？

搵合適人選

搵人幫手，唔係一定要搵最傾得埋的同事或朋友，而係搵最適合幫到這件事的人。例如公事，有些事必須要上司才有能力幫到，你搵同級的同事幫，人家又點夠膽應承你呢？又例如你搵個有仔有女的好朋友借錢，成功比率當然細個問一位單身朋友借吧。

舒適氣氛與環境

搵到適合人選，就要揀對的時機。最好在一處讓人感到舒服的環境，例如咖啡室，然後揀一個愉快的氣氛，例如對方剛完成一項工作，這時開口人家起碼較有閒情逸緻想想是否可以幫你，否則如果人家有自己的事做緊，你有甚麼問題人家都很難有心機去聆聽。

你幫我我幫你

搵人幫手，不一定代表自己只是受助的一方，其實自己也有能力幫到人。如果事前知道對方有甚麼煩惱或需要，可借此作為請人幫忙的切入點，請求對方幫手，同時亦願意幫忙對方，互相幫助，互相得益，成功搵到人幫手的機會大增。

動之以情

如果找不到切入點，可考慮行感動位。講到自己有咁悲得咁悲，有咁慘得咁慘，若非走到絕路都不想煩他，他的幫忙對你的人生起著決定性的影響，相信講到如此嚴重，對方有能力的話，應該都樂意幫忙。

讓對方感到有著數

幫人需要付出，因此對方會有所猶豫，怕蝕底。但如果將請求幫忙講到好像對方都會有所得著，那對方就有更大動力去幫忙。例如找同事幫手，如果順利完成的話，對方的功勞都會讓上司知道等等。

大忙唔得，幫個小忙

假設對方真係沒辦法幫到你這個大忙，不妨自己再細心想想，能否將個大忙拆細，搵多幾位朋友幫呢？例如問一個朋友借十萬元是很困難，嘗試問十個朋友每人借一萬元，會否更易成功？