歐洲及日本繼續「印銀紙」，日本國內嘅經典車，無論本土或進口型號都一率齊升。就以60年代末及70年代初嘅日產、豐田及萬事得為例，KPGC10 Skyline GT-R就足足升近一倍有多，由2005年時低位的300萬至500萬日圓，一跳至700萬起錶，部份優質盤更高至1000萬日圓或以外。至於產量極低，總數不多於200部的KPGC110 GT-R，至少要2000萬日圓。而一向被視為又靚又棘手嘅萬事得元祖轉子引擎跑車Cosmo Sport，售價更由300萬日圓跳升至近800萬日圓。而被視為神級日本經典車嘅豐田2000 GT，近日的拍賣成交價已達100萬美元。

日產Skyline GT-R（PGC10型），1969年

日產Skyline GT-R（KPGC110型），1973年

豐田2000 GT跑車曾在占士邦電影亮相

豐田2000 GT是少數成交價達700萬港元的日本經典車，圖為豐田東富士跑道

有從事歐日的經典車投資的專家認為，造成上述原因，很大程度上與日圓下滑，外國車迷到日本搜購日本經典車有關。事實上，愈來愈多歐美地區的經典車迷到日本執正嘢，日本橫濱的經典車店Deuce Factory嘅老闆表示，美國玩家最鐘意揀日產Fairlady Z、Datsun 510(Bluebird)、本田S800開篷跑車，因為呢三款車在六、七十年代曾經輸往美國，但當時數量少，新一代收藏家想儲齊，都無法在北美搵到，唯有遠渡重洋。

日產元祖Fairlady Z

以為美國車迷淨係識玩熱門型號？唔係啦，而家Playstation、XBox、PC嘅賽車遊戲咁多人玩，加埋偉大嘅互聯網，當地嘅車迷都好熟日本本土型號(JDM）嘅經典車，例如豐田Sport 800及七十年代嘅Skyline，Deuce Factory嘅老闆話有加州嘅車迷口味勁獨特，一口氣買咗兩部本田Step Van，又有中美洲哥斯達尼加嘅收藏家，最近買咗部RT55型豐田1600 GT。

本田Life Step Van

豐田Sport 800

其實，升值嘅亦包括保時捷氣冷引擎911及部份車齡由15年起的法拉利，以法拉利F512M為例，「印鈔前」在日本的中古巿場約售1800萬日圓（折合約120萬港元），現時已急升至4500萬日圓（折合約300萬港元），呻笨？咁都無用㗎喎。

法拉利F512M

不過，投資經典車同投資活動一樣，可升可跌。九零年代初期，日本一度擁有全球最多嘅法拉利F40，當年售價約為100萬美元，但也曾一度低見至50萬美元，呢期雖然升番唔少，但距離昔日最高位仍有少少距離，算唔算見到家鄉，閣下自行判斷。