放假去旅行少不免買手信呢樣嘢,要數日本必買嘅手信真係數到天黑都數唔哂,例如早幾年COMME des GARÇONS忽發其想,將本來只能用幾次嘅品牌紙袋包上PVC膠,即時變成一個勁有特色嘅Tote Bag,由於只賣幾千Yen時至今日已經變成外地人必買手信之一。本來只限日本獨佔嘅袋款,最近因為香港CdG專門店開業10年,而變奏成一個屬於香港獨有嘅CdG「手信」袋!
日本專門店嘅COMME des GARÇONS「手信」袋
由2007年喺中環安蘭街開設當時全球第4間分店,後來2009年因收樓而搬遷至雪廠街,再到2014年尾嘅銅鑼灣百德新街分店,唔經唔覺COMME des GARÇONS專門店已經登陸香港10年。為咗隆重其事,中環雪廠街COMME des GARÇONS專門店近日就換上全白裝置鋪陳並展出五件由川久保玲所挑選嘅全白色showpiece,同時更特別推出10週年紀念版手抽袋,以日本專門店所發售嘅PVC膠「紙袋」為靈感,變奏出全新PVC膠Tote Bag,袋上更印有「COMME des GARÇONS HK 10th Anniversary Bag」紀念文字,令袋款更具收藏價值,明天(9月8日)正式於雪廠街專門店開售,售價為港幣$699元。