Nike 近嚟嘅舉動真係可以用 「出位過界」嚟形容。唔係話佢做埋啲污糟邋遢嘢呀，我指嘅係佢哋先後公佈嘅兩大聯名系列，都係由兩種唔同嘅運動方面做合作：第一就係稍早時候已經正式發售嘅，由籃球陣容方面嘅 Jordan Brand，對上足球陣容方面，法國頂級球會巴黎聖日耳門，兩者合作推出嘅聯名系列；而第二就係今次文章嘅主角：NBA 同埋 Nike SB。

老老實實，我覺得籃球同滑板，比起足球同籃球係合理好多，特別係喺 Nike 嘅立場嚟講就更加合情合理。講起 Nike SB，比較有啲資歷嘅 Sneakerhead 就一定會提起 SB Dunk Low 呢個鞋款，各種限量款，特別版本例如：City Pack、Staple，又或是同 Supreme 聯名推出過嘅幾款 Cement 配色等等，都係炒至天價，什至有錢都買唔到嘅傳奇鞋款；而SB Dunk Low 呢個鞋款亦係由 Nike 嘅籃球鞋款 Dunk 所衍生出嚟。

細佬我當年有過嘅 Diamond Supply SB Dunk Low 都係傳奇鞋款，可惜已賣，後悔都嚟唔切。

事關當年 「滑板鞋」呢個概念未被普及，眾多板仔因為當時新推出嘅 Dunk 鞋款配色多夠搶眼而成為板仔最愛；而同期嘅 Air Jordan 1 亦同為板仔腳下愛將，無他嘅，兩者嘅平底加上價錢同品質 (特別係當時嘅AJ1係因為產量太多要放去清貨)，而新手板仔就更愛上佢高筒設計無咁易受傷。

瞬間返嚟 2018 年，經歷過滑板行業得到傳統運動商重視後，滑板連帶其玩家同商品都成為市場上獨當一面嘅存在，好少再聽到同籃球或其他運動混為一談；而 Nike SB 亦多數只會搵圍內嘅牌子合作：Diamond Supply同上文提到嘅 Staple 同 Supreme等等，今次同 NBA 嘅合作可以話係「尋根」。因為除咗上文重點著筆嘅 Dunk 鞋款，仲會推出當年 Dunk 未推出時，同樣受板仔愛戴嘅 Blazer 同 Bruin 鞋款。當然啦，除咗呢三大鞋款，仲會推出服飾單品如 Hoodie 同埋 Jacket。