2009年電影《阿凡達》（Avatar）票房勁收，同時亦掀起咗3D電視潮流。南韓三星（Samsung）喺2010年2月正式推出3D TV，短短一、兩年，全球各大影音產品店都見到3D TV蹤影，試同讚嘅人唔少，但買嘅人唔算多。

原因係：要睇3D TV，你要有相對嘅軟件，咁即係要有3D Blu-Ray機同3D版嘅Blu-Ray碟，仲要有3D TV嘅專用眼鏡，以Sony同Panasonic嘅3D專用眼鏡為例，平均要七百幾港元一隻。一家四口，咁又斬你兩、三千蚊。

差啲唔記得講，3D Blu-Ray機亦要有專用嘅高速HDMI線，如果對線材稍有要求，咁又一條數，消費者諗諗吓都係去戲院睇算數，十零廿蚊副3D眼鏡之嘛。

3D TV播放器材賣得唔好，電影/軟件開發商亦都減慢推出或暫停推出3D版Blu-Ray，惡性循環，最終玩＿完。另方面，日本品牌生產商，亦都將資源專注到4K同8K廣播，邊有咁得閒同你癲。

埋單計數，有7年貨仔，算係咁喇。