Photos: Tamiya Japan

有時，無聊有無聊嘅開心。

一個人玩吓啲別人眼中可能係「低能嘢」嘅玩具，分分鐘有想不到嘅樂趣。

唔使吓吓買嚿嘢，萬萬聲落樓，飛上天咁先叫開心嘅。

日本田宮（Tamiya）模型喺今年初，喺佢哋嘅Craft Models系列（有啲香港模型友稱佢為田宮科學模型），推出咗一款水上電單車。

呢款水上電單車前進嘅原理，唔係單純靠螺旋槳/槳葉/車葉直接撥水，以產生推力；而係靠一個離心力泵（Centrifugal Pump），將水快速地吸索入泵內，再經泵內嘅葉片及噴水口擠出強力水柱，推動載體。

唉！唔使講到咁複雜嘅，呢啲嘢你一睇就明啦。售價2000日圓，有巴打話見過旺角廣華街有得賣。

呢款模型長約13cm，闊約5.2cm，一粒3A電池驅動，喺浴室玩吓又得，放個盤仔玩又得，再唔係老媽子洗緊菜，問佢借個位玩吓都得。

各位，我想請問，維園個放船仔水池拆咗未？小弟好耐冇去過喇。