AI當道，大吉利是講句，分分鐘隨時冇得撈，尤其係好多一直倚賴人類經驗嘅工種。 

日本航運界兩大巨人三井商船（Mitsui O.S.K. Lines，logo係有條Q版鱷魚托住個貨櫃）同日本郵船（Nippon Yusen）宣布發展結合人工智能（A.I.）同互聯網系統嘅自動駕駛商船，預計成品最遲可於2025年之前下水。

系統原理係透過收集即時及預報天氣，以及航道情況，例如有冇障礙物，以A.I.功能規劃一條最慳油、最安全同最快嘅航線。 

除咗應用喺導航同更「慳水慳力」航行呢兩大層面，兩間公司更想借A.I.監察船隻嘅實時機件狀態，從而預測有可能發生嘅機械故障（你知啦，船咁大咁重，唔係話停就停），有效避免每年約2000宗嘅海事意外。

另方面，航運界面對缺乏年青人入行，亦係業界加快發展自動駕駛商船嘅原因之一。

日本造船業多年來飽受新興巿場挑戰，目前喺國際嘅巿場佔有率只有約20%，兩間公司預測自動駕商船，有助將佔有率重返「三字頭」水平。日本郵船預計首批製造嘅自動駕駛船約有250艘。 

其實，唔只日本虎視眈眈自動駕商船，挪威已經設立自動駕駛商測試區，有製造商船引擎嘅英國勞斯萊斯（Rolls Royce）已宣布開發自動駕駛海航系統。 

唔知N年之後，「行船」仲會唔會係三分險？《鐵達尼號》會唔會變成「膠」片？