Photos: Fujifilm Japan

1986年面世嘅富士（Fujifilm）「用完即棄傻瓜機」，係唔少七十後、八十後，以至九十後（前期型）嘅童年回憶。

呢類機當年廿零卅蚊就有交易，筆者keep住一部98年未開過，當年售價為$45。

講真，今時今日要影張相，話都冇咁易，想買部用吓回味吓，你可能笑我「CF痕」。

富士繼去年30周年推出50,000部限量版，今年再添食（無需理由），限量推出30,000套Premium Kit。今次比往年好，因為嗰個綠色主調，配金色同紅白間條嘅經典packing，已經變成矽膠殼，畀你笠住而家一嚿黑膠嘅「用完即棄傻瓜機」。

即係話，你以後用富士「用完即棄傻瓜機」，幫佢戴返個套，經典packing可以「無限復活」。

成套Kit包兩部「用完即棄傻瓜機」、每部可影27張相，內置400度感光菲林，一個上面提過嘅矽膠殼、仲有個綠色金屬扣，方便你扣住背囊或Tote Bag。6月23日喺日本開賣，至於價錢呢……仲未見有資料。