部份想搵錢嘅大學生或自由職人士心態：搵份「七仔」店務員做吓，再兼多份冇咁「chur」嘅freelance，寧願慳啲，都想過得自在啲。 

呢支哥喺十年後唔知仲唱唔唱得響，日本7-Eleven同Family Mart，計劃喺2025年之前，全面引入自動付款系統。屆時店內所有貨品都有無線射頻識別（RFID）標籤，當系統接收到顧客以電子貨幣結賬，RFID即與防盜系統聯動，開門畀客人。

換言之，唔使再排隊畀錢。日本兩大連鎖便利店有此想法，主要係有志從事便利店工作嘅勞動力（兼職及長職）下降，部份偏遠或老齡化地區，即使高薪聘請員工仍經常唔夠人手。

若RFID自動付款系統快速普及，到時想搵份「七仔」店務員撈吓都唔易，考定個貨車牌送貨囉

業界睇好RFID喺零售業，尤其連鎖便利店嘅發展。雖然話十年八年後去日本旅行，可能已見唔到好有禮貌嘅「些粉」收銀員，但便利店始終需要有職員「駐場」，解決電腦搞唔掂嘅難題，例如你條衰仔飲到醉晒，仲要走入七仔走圍嘔，咁總要人清潔拖返乾淨㗎嘛，咁你嘔多啲啦！