唔知係唔係受「縮水版」任天堂（Nintendo）灰機、紅白機刺激，近廿幾卅年喺Game壇浮浮沉沉嘅雅達利（Atari）都話要復出，重新推出主機。 

佢哋嘅主機，已經喺早前E3嘅Trailer展示過，但21秒嘅Teaser，撚吓鏡頭，pan兩pan，完全冇實在嘅資料。

兩派說法：片中出現嘅主機純粹係「道具」，畀fans諗返起77年誕生嘅Atari 2600，只為「喚起回憶」，即係呃like啦；另一說法係另有主機，據講係「Ataribox」嘅疑似真身圖片，亦已經喺部份歐洲Game評網站出現，樣就麻麻哋，似元祖Xbox。

有闗Ataribox嘅資料唔多，Atari CEO只提到「建基於PC技術」「開發多年」……哈哈！建基於PC……可圈可點喎。咁究竟遊戲軟件載體係咩型式，以至只係玩舊game定只限新Game？唔知。

個人認為，最好同Teaser裡面嗰部「啡色主機」差唔多啦，講真，買得嘅都係想回憶Atari最輝煌嘅年代。