Photos: Wikipedia

成日都有研究指，日本東京好大機會喺短期內發生大地震。

「短期？」「大地震大成點？」 

上月底喺日本成立嘅防震災害組織——日本地震研究協會指出，東京都喺未來20至30年內，有70%發生強度達7級嘅地震。如果地震發生喺晚間，而發生地點位於東京都中央嘅南部，將有多達610,000座大廈會全毀或陷入火海，至少23,000人失去生命。

日本地震研究協會嘅成員包括政府官員、學者及商界人士。協會表示，目前東京都有500個地震監察站，但整個網絡不足以仔細探測地震及評估地震嘅損毀程度。 

協會計劃透過私人機構參與，例如電訊商NTT Docomo、JR東日本、東京燃氣，大幅度增設地震儀至約4000部。人工智能（A.I.）系統將收集到嘅相關數據加以分析，協會最終目標係估計每幢大廈會點樣搖晃，從而幫助設計疏散路線及更安全嘅疏散集點地點。

一般嚟講，因板塊下降而造成嘅7級大地震，約27年發生一次。東京都地區對上一次嘅7級（或相近強度）大地震，發生喺1987年12月，地點位於毗鄰東京都嘅千葉縣東海岸，地震強度6.7級。 

喂喂，東京都附近再有7級大地震，喺海震吓就算OK？唔好引發海嘯，得唔得？