蘋果（Apple）啱啱將iPod nano及iPod shuffle從產品目錄中刪除，並向傳媒證實兩款產品經已停產，換言之，仲想買iPod只能揀iPod touch。

每當有高度認受性又多人用嘅產品停產，通常都好多人話：「唉吔，唔捨得呀！」「點解呀？」總之扁晒咀咁嘅樣。但係，當知道iPod nano同iPod shuffle停產，我真係冇乜感覺。

不過，iPod nano同iPod shuffle確實有佢好正嘅地方，喺佢哋推出嗰陣，即係2005年，佢哋嘅外型算係最靚仔，操作亦最易最就手，而且以價論貨都幾值嘅，公司Annual Dinner、飯局、聖誕抽獎，買嚟做獎品一流。

自用方面，揸車嘅巴打放一部喺手套箱，好慳位，需記得，嗰時嘅新車，仲未流行有USB插頭，機頭亦未全面對應手提digital audio player或手機（顯示繁體或簡體中文字經常亂碼）。自備額外嘅digital audio player就唔使煩。但係，iPod nano換電好麻煩，唔熟手，好易撬爆殼。