Photos: DoT.

一講到「Hand Carry細喼」上機，實有人無名火起。

部份原因可能係：「有啲友呀，買鬼死咁多嘢，塞到個喼又勁重，人又虧，手軟腳軟，冇力托上行李架，幾乎成個喼跣落我膊頭，想收埋人命咩！」

另一啲又話：「佢嗰個望極都唔似Hand Carry細喼囉，唔知啲航空公司同安檢點解肯畀佢入閘。」 

都係嗰句，識得自律嘅人愈嚟愈少，自以為係遊走灰色地帶嘅專家就愈來愈多。

其實，短trip拎個細喼，唔使寄倉，唔使等行李，真係爽好多，所以細喼不乏fans，應該話，擁躉愈來愈多先啱。 

日本Softbank屬下嘅DoT.，以日本旅行喼製造商Proteca嘅MAXPASS系列為開發基礎，推出MAXPASS SMART。佢長51cm、闊39cm、高25cm，淨重3.5kg，容量39公升，夠放13吋Notebook電腦，對應日本國內、國外100座位或以上載客量嘅客機。

所謂SMART，梗係唔識得幫你掘比特幣啦。其實只係喼內設有「尿袋」（USB充電池）同TrackR Bravo追蹤器。

先講「尿袋」，內有5000mAh鋰離子聚合物電池，廠方話足夠「餵飽」目前大部份手機兩次，電池連接住可伸縮嘅100 cm USB充電線（附有Lightning轉換插頭），鍾意坐定定喺度充又得，一路行一路充亦可。電池可以獨立拆走，既適合唔同類型用家要求，亦能畀用家拆出電池，接受機場安檢。

另外，喼內設有TrackR藍牙追蹤器，只要預先做咗配對同啟動手機藍牙功能，系統就會監察手機與喼內追蹤器之間嘅距離，當系統發現兩者之間已超逾安全距離，行李喼即發出響號，而手機亦有響號，提醒用家。

Proteca品牌強調「Made in Japan」，MAXPASS SMART都冇例外，66000日圓，即約$4700港元，貴定抵買，你心中有數啦。