呢期零舍熱，中午有太陽曬落嚟，手臂覺得赤赤熱，間中要外勤工作或長期喺戶外工作嘅巴打就辛苦喇。 

氣溫高，手機工作溫度一樣咁高，喺冇遮冇掩嘅情況下，手機屏幕同機背都係熱辣辣，好多人都驚咁樣繼續用「會唔會壞㗎」？驚又點，唔通唔用牙？ 

網上（咩國家都有）有好多方法，例如拿拿淋行入便利店降溫、企近冷氣出風口「兜口兜面」吹吓部機，甚至用「退熱貼」墊住手機嚟用（聽落好似有啲科學根據）。

喺日本擁有160多間通訊業大企會員嘅Mobile Computing Promotion Consortium，畀咗少少建議大家，值得參考。 

當用家發現手機好熱，應立即走到有遮閉地點或陰涼處，避免手機被日光直射。 

但唔好對正冷氣機出口，又或喺機背或屏幕塗抹冷凍劑（例如冰水），因為溫度驟然急降，手機內嘅零件好大機會產生微細水點，尤其是充電接口嘅金屬部份，用家以為乾透，原來仲有水點積存喺睇唔到嘅位置，當你再次充電，好易發生短路。用風扇冷卻機身就安全好多。 

大佬，我喺戶外工作，咁點算呀？應檢查有冇打緊機（唔係講你支私人joystick）、睇緊片或著咗相機，仲有冇啲「大食」嘅程式，有嘅都暫時熄咗先。可以嘅話，熄咗機，拔出電池（內置電就冇偈嘞），畀部機休息一陣。 

做到就做啦。