Tesla創辦人Elon Musk旗下生意一向多元化，上天有SpaceX嘅火箭，地面有電動車，地底更有Hyperloop超級高鐵。近日外國爆料網站 SlashLeaks分享咗疑似Tesla自家智能手機嘅圖片，網站更指出呢部智能手機名為「Quadra」，本消息係真定假就未能證實。

「Quadra」流出機面嘅外型與iPhone X有幾分相似，除咗喺屏幕頂部有凸出咗嘅M字額，機面亦採用咗全屏幕設計，而且機面邊框非常幼，所以「Quadra」嘅屏幕佔比非常高。另外，喺機面凸出嘅M字額中都有唔同嘅預留空間，估計M字額內會有聽筒、環境光傳感器及前置相機。

由「Quadra」流出咗背部設計睇到，除咗有大大個Tesla Logo之外，仲有一個預留畀鏡頭嘅空位，從空位Size嚟睇「Quadra」將會採用後置雙鏡頭設計。喺Tesla Logo之下有疑似「G4」嘅字樣，估計有機會係手機型號，而機背底部嘅一條窄長鏤空，好可能係喇叭嘅位置。

其實Tesla要推出首部自家智能手機都唔係無可能，因為去年年底Tesla已經出過一個流動電源，相信唔會係Tesla唯一嘅流動裝置產品。如果Tesla真係要推出智能手機，希望喺電力續航上會為市場帶嚟改變及衝擊。

來源︰SlashLeaks