「If you can't beat them, join them」，既然Google唔能夠打倒中國(網絡)長城，不如跪低整個「審查版」搜尋引擎去迎合中國市場。美國網媒《The Intercept》引述Google內部文件及消息人士指出，Google由舊年開始啟動咗代號為「Dragonfly(蜻蜓)」嘅計劃，而計劃致力研發一個可以經由中國政府審查後，將敏感詞彙及議題全數過濾嘅「審查版」搜尋引擎。

8年前，Google因為內容審查問題與中國政府交涉，最終為咗抗議中國網路審查制度，Google關閉咗中國版網頁搜尋服務並退出中國市場，當時Google共同創辦人Sergey Brin以「集權主義」形容中國政府。但其實Google想重返中國已經唔係今日嘅事，3年前Google現任CEO Sundar Pichai上任時已經講過，「我希望可以喺世界每個角落服務用戶，而Google是每個人嘅，我哋希望可以進入中國市場及服務中國用戶」。

美國網媒《The Intercept》報道中，有Google多名工程師以匿名身份表示，團隊正開發緊一個能夠限制被北京禁止內容嘅搜索應用程式，並已經向中國官員展示兩個名為「Maotai(茅台)」及「longfei(龍飛)」嘅Demo。「審查版」搜尋引擎能夠將將敏感詞彙、圖片、拼寫或網站列為黑名單，當中包括維基百科及BBC等，預計搜尋引擎會喺6至9個月內推出。

雖然Google喺今年5月已經喺中國推出檔案管理App，以及喺WeChat平台上推出咗一款遊戲，令Google重返中國可能性大大增加。但中國《證券日報》今日指出，有關Google重返中國嘅傳聞並不屬實，報道又引述分析人士指出，喺目前中國嘅大背景下，Google無能可能喺短期內重返中國。事實上，Google重返中國最直接影響嘅係中國互聯網巨頭百度，因為百度喺中國經營類近業務，相信百度唔會唔「出手」阻止掛。

來源：《The Intercept》、《紐約時報》