Apple即將推出嘅新iPhone將會採用由7nm工藝製成嘅A12處理器，而所有A12都由台積電代工生產。日前台積電爆出被電腦病毒「WannaCry」入侵，令部分生產線被迫中斷，市場估計iPhone A12處理器生產可能會延遲。晶片生產延遲好可能會導致新iPhone出貨時間濟後，到時iPhone供不應求，最終好可能只會益咗炒家，真正用家又要等一等喇。

據了解，今次台積電受電腦病毒入侵事件中，有新竹、台中及台南三處廠區　受影響，當中牽涉28nm、16nm及7nm嘅製程生產基地。台積電指出，現時8成受影響生產線已經回復正常運作，預計今日所有受影響機台都可以恢復正常。雖然台積電好快就令生產線恢復運作，但市場預料台積電第三季收入會因事件而倒退約3%，即影響約2.535億至2.565億美元，折合為20億港元。

台積電生產線體影響首當其衝一定係Apple，因為Apple係台積電最大客戶，佔咗台積電收入超過21%，而且距離Apple嘅9月秋季發布會臨近，3部即將推出嘅新iPhone出貨時間自然好大機會受影響。此外，高通、華為、AMD等廠商都有晶片交由台積電代工，但目前仲未知有無影響。

來源：Bloomberg