即將喺12月7日發售嘅任天堂 Switch大作《任天堂明星大亂鬥特別版》，遊戲喺噚晚嘅「任天堂明星大亂鬥 SPECIAL Direct 2018.8.8」直播節目中宣布咗新角色，《大亂鬥》將會加入嚟自KONAMI 經典動作遊戲《惡魔城》系列角色，包括「西蒙‧貝爾蒙多(シモン‧ベルモンド)」以及「里希達‧貝爾蒙多(リヒター‧ベルモンド)」。

《大亂鬥》新加入咗《惡魔城》西蒙‧貝爾蒙多及里希達‧貝爾蒙多等系列角色，亦收錄咗《惡魔城》地圖及34首嚟自《惡魔城》嘅原聲音樂。此外，《大亂鬥》仲公布咗多名支援角色，玩家可以喺遊戲中召喚佢哋協助作戰，當中有《惡魔城》嘅德古拉、《鏟子騎士》嘅主角、《塞爾達傳說：梅祖拉的假面》嘅月亮、《怪物獵人》嘅雄火龍，以及多隻寶可夢(寵物小精靈)。

遊戲中嘅戰鬥舞台數量多達103個，較舊作《任天堂明星大亂鬥Wii U》56個戰鬥舞台多出近兩倍。而每個遊戲地圖都支援八人對戰，並可以設置為「戰場」、「終點」及「大戰場」三種模式，即係話地圖數量超過300幅，而且玩家可以設置戰鬥時雙舞台切換。

另外，新嘅訓練模式加入咗方格專用場地，會標示出玩家攻擊嘅擊飛角度、高度及距離，適合玩家反復練習。遊戲中亦收錄咗超過800首場景曲目，加埋介面音樂，就有成900首歌，要聽晒都需要時28小時，而Switch喺手提模式下，仲可以當Player咁播歌。