當你共享單車熱潮逐漸熄滅嘅時候，另一股熱潮正喺世界各地醞釀緊，佢就係「共享電動滑板車」；目前「共享電動滑板車」喺美國本土非常盛行，並正打入緊歐洲市場。電動滑板車用電池驅動，車身細小兼輕巧，喺新界周不時都會見到人用嚟代步，但目前喺香港用其實仲係犯法，仲隨時揹5條罪，包括危險駕駛、無牌駕駛、無第三者保險下駕駛等罪行，所以香港人都係羨慕吓好喇！

「共享電動滑板車」係美國非常新而且受關注嘅初創行業，兩大「共享電動滑板車」巨頭Bird及Lime先後由美國本土開始，逐漸進軍歐洲以及中東市場。目前喺美國本土已經有33個城市推出咗「共享電動滑板車」服務，其中Bird係先收取1美元開鎖費，而每使用滑板車1分鐘就會收取0.15美元費用。共享滑板車同共享單車一樣，都係以平收費、方便為賣點，但更重要嘅係滑板車用電，啫係使用一啲力都唔使用，加上騎上時只需站立，適合一眾懶人以及著裙嘅女士。

營運「共享電動滑板車」最大困難就係法律，除咗亂泊車等問題外，電動滑板車速度非常快，容易引起交通意外，例如美國三藩市正研究緊限制發牌數目。喺香港方面，曾經有市民使用同類型電動滑板車發生意外，更被控至少5 條罪行，包括危險駕駛、無牌駕駛、無第三者保險下駕駛、駕駛未獲發牌車輛及無佩戴防護頭盔，同時要承受「監禁、罰款、停牌、民事索償」等四重後果。

來源：TechCrunch