Apple最近成為全球第一間市值突破1萬億美元嘅上市公司後，知名Apple產品分析師郭明錤發投資報告爆料指，預計Apple將會喺2023年至2025年之間推出Apple Car，而Apple Car將會係Apple嘅下一個明星級產品。相信Apple Car除咗會挑戰一眾傳統車廠外，對電動車廠Tesla嚟講亦會係一大威脅。

知名Apple產品分析師郭明錤今日發表咗最新投資報告，推測Apple最快會喺2023年實現「Project Titan」自動駕駛汽車計劃，並發售新產品Apple Car，報告指出新產品會推動Apple市值邁向2萬億美元。郭明錤表示，而家嘅汽車產業同10年前嘅智能手機市場差唔多，都係有巨大嘅潛在替代需求正在出現，例如以AR(擴增實境)技術重新定義汽車，但具體應用細節就並無透露。

除咗Apple Car之外，郭明錤預期Apple喺2020年將會推出AR眼鏡，佢認為雖然目前AR技術非常流行，但現時嘅AR體驗都唔算太好，佢期望Apple將會推出嘅AR眼鏡能夠為用家帶嚟全新嘅使用體驗，亦都可以重新定義現有產品嘅UI介面。因為Apple過去都曾經重新定義過唔少產品，包括Mac滑鼠、iPod滾輪，以及iPhone嘅多點觸控等，呢啲技術改進都幫助Apple嘅業績有所增長。

來源：MacRumors