傳統觀念認為打機係會有損健康，除咗會令到沉迷打機嘅青少年影響心理、窒礙人際溝通，甚至令玩家受血腥暴力影響變得具侵略性。而維多利亞青年商會反其道而行，日前舉辦咗「夏日電子競技盃」，利用「電子競技」關注香港青少年心理健康問題。

早前喺數碼港舉行嘅「夏日電子競技盃」有接近100位香港青少年參與，比賽以電競為主題推廣關注青少年嘅心理健康發展。商會發言人指出，舉辦競技盃嘅目的係以「打機」為切入點，發掘青少年嘅優點及興趣，提升佢哋嘅自我認知，並協助青少年訂立個人目標，鼓勵佢哋為夢想而努力。此外，其實打機除咗可以釋放壓力外，專業嘅電競訓練都能夠提高青少年嘅集中力及手眼協調等。

出席活動嘅助理政府資訊科技總監黃志光表示，近年玩電子遊戲已經由一般消閒活動發展為「電子競技」，而2016年全球電競產業市場規模已達4.6億美元，可見電競已成為經濟增長新動力，而政府亦將會向數碼港撥款1億元，用於將數碼港商場發展為電競及數碼娛樂熱點，為電競比賽提供場地，以推動電競產業的發展。

不過始終過量嘅打機都唔係好事，早前世界衞生組織亦建議將「遊戲障礙」納入「國際疾病分類」，啫係話日後「打機成癮」可能會定義一種疾病，而「遊戲障礙」係包括對遊戲失去自制能力、嚴重影響個人、家庭、社交生活等，並持續最少12個月。