距離Apple秋季發布會仲有唔夠一星期，據了解Apple將推出嘅旗艦iPhone將會用上7nm制程嘅A12晶片，令iPhone喺晶片技術上將會遙遙領先其他競爭對手，而呢個晶片優勢將會持續到明年。如果真有其事的話，相信新iPhone嘅速度又要拋離一眾Android手機喇(價錢唔知會唔會進一步拋離)。

據外媒9to5mac報道，新iPhone將會採用突破性嘅7nm制程嘅A12晶片。有供應鏈消息人士指出，目前大多數智能手機仲未可以採用低於10nm制程嘅晶片，因為低於10nm制程嘅晶片製造過程需要更多資金投入，令唔少晶片製造商基於成本考慮而減慢投資步伐，相反佢哋繼續採用12、14nm制程嚟生產晶片。

消息指，四大晶片製造商已經延遲或者擱置為Android手機提供7nm制程晶片嘅計劃。而今年新推出嘅iPhone有傳速度比iPhone X快20至30%，當中7nm制程嘅A12晶片係速度更快嘅一個重要因素。

來源：9to5mac