提到Tesla大家都會將佢歸類為科技公司，除咗因為創辦人Elon Musk旗下有幾間科技公司之外，亦因為Tesla所製造嘅係電動車，亦非傳統汽車。目前Tesla仍然喺電動車市場上佔有領導地位，但傳統車廠都開始積極研發電動車，加上有唔上初創公司都打算喺呢個市場一展拳腳，究竟現時舉債不斷嘅Tesla能否力保市場地位呢？

高盛日前喺一封畀投資人嘅信件中表示，由於Tesla正面臨嚴峻嘅產業競爭，估計未來半年內Tesla潛在跌幅高達30%。高盛分析師David Tamberrino喺信中提到，目前喺電動車產業中已經出現咗越嚟越多競爭者，同時佢亦唔睇好Tesla嘅執行力、量產能力，相信喺Model 3喺未來為Tesla帶嚟短期正面消息後，將會面對嚴峻嘅前景。

事實上近期電動車市場都有唔少新動向，日前德國汽車大廠Mercedes-Benz正式推出「EQC」SUV，就連英國電器製造商Dyson都透露將會建造電動車研發及測試中心。而去年，Volkswagen、Mercedes-Benz、BMW、Audi等車廠為咗對抗Tesla，合資成立咗一間能源公司「IONITY」，目標係於全歐洲建立統一規格嘅電動車充電網。

產業諮詢公司LMC Automotive預期，Tesla市佔率喺未來 10年內有機會目前嘅12.3%暴跌至2.8%。難怪早前股神巴菲特都話，汽車業競爭大且經營困難，即使你今年領先對手，下年對手都可以抄襲後來居上，所以佢形容Apple投資Tesla嘅提議係「Very Poor Idea」。

來源：CNBC