消息停不了，雖然連日嚟都有唔同嘅新iPhone消息，但關於平價版6.1吋LCD iPhone嘅資料就比較少喇。噚日就曝光咗平價版iPhone 64GB版本售價由HKD$5988起跳，今日外國網站Slashleaks就爆出平價版iPhone嘅原型機圖片，唔知平價版iPhone又吸唔吸引到大家呢？

今次由Slashleaks爆出嘅圖片可以睇到，平價版6.1吋LCD iPhone將會有紅、藍、白3種色，但唔知紅色係咪PRODUCT(RED)嘅特別配色，呢部機並將會配備面部辨識系統、雙卡雙待功能。另外，由爆出嘅圖片中睇到，背景中有濃厚中國特色嘅沖茶用具，估計圖片係由中國廠房所流出。

早前有傳聞指出，平價版iPhone將會名為iPhone 9或者iPhone XC，更有可能只係叫iPhone，但最終叫咩名仍然要等發布會當日揭曉。圖中可見，平價版iPhone同傳聞一樣，將會採用單鏡頭，以及鋁合金邊框。

另一圖片顯示，平價版iPhone的確係備有雙卡雙待功能，對經常要用到兩個電話號碼嘅用家絕對係好消息。但相中似iPhone乎係玫瑰金色，如果係的話平價版iPhone將有紅、藍、白、玫瑰金4種色(如果筆者無色盲睇錯的話)。

來源：Slashleaks