數碼相機好方便，影完即刻可以playback，唔啱可以再影，影到啱為止。數碼相機咁普及，唔少傳統攝影人認為，今日的攝影文化，已不及菲林機年代在按快門前細心部署，亦因「唔啱可以再嚟過」，有人認為數碼機令人唔尊重攝影，亦失去菲林攝影「估估吓」的趣味。

其實呢，各有理據，支持數碼攝影文化的可能話：「阿叔，Leica都出數碼機啦」。咁以Leica的江湖地位，間中搭吓歷史順風車，或開吓歷史倒車都無大問題，反正佢老子喜歡就可以，最緊要唔好潑杯麵。

早於今年Photokina發表的Leica M Edition 60，將於20日在日本開賣，售價為232萬日圓（日本版豐田Prius C都係200萬yen有找），以目前日圓兌港元65算計，約為15萬港元。Leica M Edition 60機背不設LCD Mon，影完無得即時playback，就係想買家重溫菲林機感覺。

事實上，Leica M Edition 60就係建基於Typ 240型M-P，依然是一部數碼機，再作少許改良，再配Summilux-M 35mm f/1.4 ASPH鏡頭。LCD不見了，變成ISO感光度轉盤。Leica M Edition 60全球限售600部，相信好快沽清，儘管不少人批評Leica到喉唔到肺，玩得菲林feel，何不索性直截了當造部菲林機出嚟。