{ SKIP }
文:MenClub Patrick  圖:互聯網
POSTED ON 04 Mar 2015
想知上半年各大廠有何重頭手機推出,最好就係捕實每年年頭在西班牙巴塞隆拿舉行的Mobile World Congress(MWC,世界流動通訊大會),冇走雞!今屆MWC將於明天落幕,所有新手機及新科技經已通晒天,可以來個roundup,以下筆者將大家數出十大最矚目的新產品,讓Gentlemen一次過睇晒今屆MWC的重點。




1. 規格升級唔轉樣 HTC One M9
作為全MWC唯一可與Samsung GALAXY S6/S6 edge對憾的手機,就算HTC One M9的外形跟上代M8幾乎一樣,世人都總會關注一下它,聽聞3月尾就會推出,機價接近$6,000!(其實仔細睇會發現邊框的顏色與髮絲紋跟機背是不同的,這就是它在外觀上跟M8的分別。)

M9將大部分規格都升級到最新最強的水平,例如採用Qualcomm Snapdragon 810的四加四核心CPU,再配合3GB RAM去增強效能;機背鏡頭的像素增加至2,000萬,前鏡頭則改用UltraPixel感光元件去提升自拍質素;而屏幕上下的HTC BoomSound喇叭,今次更加支援Dolby 5.1虛擬環繞聲,強化播片音效。但是,它的5吋屏幕卻維持只有1,920x1,080解像度,未達該有的2K級數,是最令人失望的地方。





2. 唔執輸出眼罩 HTC Vive
除了M9,HTC還在MWC上發表了與遊戲軟件公司Valve合作開發的VR眼罩HTC Vive。這類眼罩,Samsung又出,Microsoft又出,現在連HTC都唔執輸,開發者版本將於春季推出,市售版則於年底登場。

Vive跟Samsung Gear VR的功能大同小異,都係將它們連接了手機之後,用家就能在眼罩中睇到360度的全息畫面,用來玩game最正。不過實用與否,始終要睇有幾多game支援,HTC表示已跟Vertigo Games、Bossa、Barry-Fireproof等幾間遊戲開發公司達成合作協議,看來在Vive正式推出前,應該會知道有咩game玩。





3. 平板行先 Sony Xperia Z4 Tablet
因Xperia Z4延遲面世,所以今年Sony沒有旗艦手機在MWC上發表,只有一部中階手機Xperia M4 Aqua,所以焦點都落在她的新款tablet Xperia Z4 Tablet身上,tablet比手機先行。

講規格,Z4 Tablet配備10.1吋2,560x1,600屏幕、Snapdraon 810八核心處理器、810萬像素主鏡頭及510萬像素前鏡頭,牌面唔弱,而且重量只有389g,真係輕得很!不過,它的定價亦都唔弱,Wi-Fi版為559Eur(約$4,952),4G版更索價659Eur(約$5,114),貴咗啲!





4. 激似Sony T系DC Lenovo Vibe Shot
想不到Lenovo的手機也會備受矚目吧?不過這部Vibe Shot的設計真係幾特別,似足多年前的Sony Cyber-shot T系DC,最終大家會不會用它是另一件事,但至少大家會記得有這一部手機出現過。

它的機背除了似DC之外,還用上拉絲仿金屬蓋,再配合鋁合金的邊框,睇得出係有認真設計過。規格方面,除了主鏡頭有1,600萬像素之外,還具備三色補光燈及OIS光學防手震系統,連前置鏡頭都有800萬像素,同時亦採用Snapdraon 615八核心CPU及5吋1,080p屏幕,內涵唔錯,預計定價都只係US$349(約$2,715),繼續有Lenovo手機的抵用本色。





5. 首部全景聲手機 Lenovo A7000
更加想不到十大矚目新品之中,竟然會有兩部Lenovo手機入圍吧?係,連筆者也想不到,但這部外形極其普通的A7000,真的有特別功能,就係它是全球首部支援Dolby Atmos(全景聲)音效的手機,理論上用來睇片,會有可媲美睇影碟的環繞聲與包圍感。但實質效果如何,真係要試過先知,同埋相信需要一對靚耳機才會聽得出。

雖然A7000的其他規格卻仍屬「雞肋」貨色,例如只有5.5吋720p屏幕、MediaTek 6752m處理器、800萬像素鏡頭等,但有嶄新功能撐住,總好過一味sell平!





6. 唔出手機出tablet Nokia N1
輪到Nokia出場,無錯,係Nokia!雖然她已經手機業務賣予Microsoft,Microsoft亦已用自己個名取代了「Nokia」的名字,但其實Nokia仍有權利自行推出智能裝置,包括tablet,所以世人可在今屆MWC上見到這部Nokia N1!

別以為它是行Windows或Windows Phone系統,實情它是一部Android tablet(5.0.2),若然Nokia肯早一點出Android機,或者不會落得今日的下場。此機配備7.9吋2,048x1,536 IPS屏幕、Intel Atom四核心CPU及800萬像素鏡頭,規格也算不錯,而且Wi-Fi版售價大約只是$2,000左右,其實值得畀多次機會Nokia!





7. 調轉都講到電話 Alcatel OneTouch Idol 3
見到Alcatel也能夠入圍,應該都會估到這部OneTouch Idol 3又有特異功能吧!就係它的機頂及機底都內置了聽筒及收音咪,代表它不論機頂向上,抑或機底向上,用家都能夠如常講電話。這賣點對一般人有何用處,我睇唔透,但我知道經常被人恥笑拍劇時調轉手機拎的TBB演員很需要它,因為被人發現都可以講句:「呢部機可以調轉講電話㗎,手機嘅嘢,你識條鐵咩!」

Alcatel OneTouch Idol 3將會推出4.7吋及5.5吋版本(咁橋同iPhone 6一樣嘅?),5.5吋版本除了屏幕解像度達到1,080p(4.7吋版只有720p)外,亦會用上Snapdraon八核心處理器及2GB RAM(4.7吋版只有四核心及1GB RAM),前置鏡頭像素也比較高,達到800萬(4.7吋版只有500萬),不過兩個版本都是採用Sony的1,300萬像素後置鏡頭,相信它們的售價也不會太貴。





8. 驚人極速7,550Mbps SK 5G網絡
韓國網絡商SK也趁着MWC盛會,向世人展示他們開發中的5G網絡,據說傳輸速度能夠高達7,550Mbps,認真驚人!去到咁快有咩用?除了上下載file外,SK還指5G的網絡延遲會比4G少更多,他們在MWC現場就以遙控機械人來作示範,顯示實時傳輸指令的效果。





9. 放低部機即叉電 IKEA無線充電家具   
其實不止手機廠會參展MWC,只要跟手機扯上關係的廠商都會在MWC出現,例如家具品牌IKEA,今年就在MWC展出一系列支援無線充電功能的家具,包括書枱、茶几、枱燈等。它們是採用最大路的Qi無線充電標準,對應LG G3、Nexus 5等手機,這些機只要放在家具中的交叉位置,便能夠無線充電,夠晒特別,自然受到注目。





10. 首創雙曲芒 Samsung GALAXY S6 edge
今年MWC最矚目的,當然少不得主角之一的首部雙曲芒手機Samsung GALAXY S6 edge,不過筆者之前已詳細介紹過,不在此重覆了,未睇過報道的Gentlemen可按下面連結重溫。

樣靚好揸手!Samsung GALAXY S6 edge首創雙曲芒





自Blue Origin及Virgin Galactic於過去兩年分別成功載人上太空後,「商業太空旅行」就由小說情節,成為現實中可行嘅體驗不過,當然係只限有錢人體驗啦。而睇黎有錢人已經唔滿足於「飛上去望下個地球就落返黎」,而係 ...
tech
【太空】真 ‧ 離地餐廳 400萬上太空 望住地球食米芝蓮
28 Mar 2024
若然消息屬實,iPhone 16 Pro機身側邊將加入一個全新按鍵「Capture button」,大小與電源鍵差唔多,能方便用戶拍攝及錄影。
tech
【科技】疑似iPhone 16 Pro保護殼曝光!機身側邊加入全新「拍攝」按鍵?
27 Mar 2024