上星期介紹完日本SIM卡後，有人覺得要去到日本先可以拎到卡唔多安心，而且又冇得一落機就即時update facebook，冇咗旅行的意義喎。所以依家就幫大家搵埋可以喺香港買到嘅SIM卡，等大家安心出發。

喺香港買到嘅日本SIM卡主要都係用Softbank 3G，呢類SIM卡售價由$150-280不等，數據量就由3GB起跳，有部份數據量更加多到20GB。今次介紹嘅卡大部份都係用得7日，所以有成20GB真係未必用得晒，加上有啲SIM卡係上唔到facebook，好似下面提到嘅櫻花卡就上唔到，所以大家要上facebook打卡就唔好買呢張喇。

至於去邊度先可以買到呢啲SIM卡呢？我就推介大家去深水埗鴨寮街嘅SIM卡檔，事關嗰度嘅SIM卡類型夠多，更可以買到唔同地區嘅上網卡，而且售價亦比香港代購SIM卡或者門市平，大家去旅行前不妨去行下，順便買埋電掣插頭，咁就萬無一失啦。