上個月Xbox One銷量出奇地反勝PS4，隨即就傳出PS4同PS Vita一齊減價嘅消息，有冇咁巧合呀？唔通Sony真係開始失勢？ 

先講講4月份Xbox One喺美國嘅銷量首次超越競敵PS4，而且更喺冇大作出推出嘅情況下得到明顯增長，Microsift指Xbox One嘅銷量比去年同期激增63%，而用戶亦多咗24%。不過總銷量方面，PS4仍然以2000萬部嘅銷量，領先目前賣出1200萬部嘅Xbox One。

雖然PS4仍有明顯嘅優勢，但面對住Xbox One仍唔敢怠慢，更有傳Sony減價博銷量反彈。今次事件並唔係空穴來風，事關有人就向外國遊戲網站WholesomeGamer爆料。話說Sony就搞咗個活動比官方認可店嘅員工參加抽獎，獎品名單上就有PS4同PS Vita，有眼利嘅員工就發現獎品名單上PS4同PS Vita嘅售價分別係USD$349同USD$89，比起原來嘅定價USD$399同USD$199平咗一大截，特別係PS Vita計落只係$690港幣，非常抵玩。不禁令人聯想到Sony有機會喺下個月嘅E3宣佈減價喜訊，眼見外國劈價咁著數，我哋就問過香港SCE會唔會有減價安排，不過佢哋就話對美國減價傳聞冇回應。