真係講緊400萬ISO，唔係400萬像素呀。Canon最新相機Canon ME20F-SH，利用新技術將感光度提升到另一層次，可以喺極黑環境拍攝出全彩色高清片，感光表現係目前頂級相機嘅5倍！

外型四四方方嘅ME20F-SH有少少似120相機，但呢部咁特別嘅相機其實係用EF Mount，可以支援EF同EF-S自動對焦鏡頭，而最特別當然就係佢嘅全片幅感光元件，擁有ISO 400萬超高感光度，可以喺低於0.0005流明嘅漆黑環境拍攝，而且唔使用紅外線幫助都可以清楚拍到黑暗中嘅彩色畫面，甚至可以拍埋1080p全高清片添。雖然感光元件都係35mm，但由於只得200萬像素，所以變相令每個像點可以有19 x 19μm嘅大小，比起好似Sony A7s呢類頂級相機嘅感光面積大咗5倍有多。

其實2013年時Canon已經成功研發呢款超高感光度，當時更曾經喺日本石垣島森林入面拍咗八重山姬螢火蟲片段，可以清楚睇到尾部嘅光，仲可以拍到樹林嘅細節，而且呢個技術本身已經有天文台用緊添。

今次開放比消費市場，對象都係專業拍攝，而且為咗應付專業拍片所需，ME20F-SH有齊3.5mm收音端子、HDMI同埋2組3G/HD-SDI輸出，預計12月就會推出。隨住呢部超高感光度相機誕身，相信大家將來就可以睇到更精彩嘅天文攝影同生態攝影，以全新視野去認識世界。