電影入面被孤零零留低喺火星嘅Matt Damon，為咗解決糧食問題，就諗到用火星泥土加自己嘅便便嚟種薯仔，成件聽落好有機，亦好似好make sense，但同NASA合作研究太空種植多年嘅專家Bruce Bugbee話咁樣種薯仔未必得，「火星泥土嘅氧化鐵含量太高，好難大量種植。」佢仲話火星上嘅光線不足加上氣溫低，除非改變土壤化學分子或用基因改造植物，否則難以利用火星土壤種植。

照佢咁講，太空耕種仍然只係科幻情節啦。但實情又話唔係咁，Bugbee教授話其實已經做緊，而且進度仲非常好添。「我哋目前就種緊沙律菜，好似種生菜同蘿蔔咁，而且呢類整物仲有助水源循環再用。」利用水耕栽培同再生水係Bugbee教授認為最可行嘅方法，而且NASA亦測試緊二氧化碳環境中提取氧氣嘅方法，所以Bugbee教授話人類其實已經掌握到移民火星嘅技術，目前最大考慮只係錢。

techcrunch